المحاضرة الأولي
أولا: الفيديو الخاص بالمحاضرة
ثانيا:الحديث الخاص بالمحاضرة
أحب أعرفكم بنفسي أنا المهندس أحمد جمال أعمل في مجال الأعمال الكهروميكانيكية وأحب أشاركم ببعض المعلومات والخبرات العملية اللى إكتسبتها بحكم شغلى حتي يعم النفع على الجميع بإذن الله وهي دي فكرة القناة.
فان شاء الله الكورس اللى هبدأه باذن الله هيبقى كورس عام لكل المراحل يغلب فيه الطابع العملى عن الطابع التصميميى ودا اللي بأخذه على بعض الكورسات المشروحه سواء على النت او الكورسات الخارجية انها بتهتم بالجانب التصميمي فقط فى الشرح ويجي المهندس بعد ما يخلص الكورس ينزل الموقع يلاقى مفيش حاجه من اللى اتقالت شايفها فى الموقع ودا طبيعى لان التنفيذ حاجه والتصميم حاجه.
طبعا انا مش بقول مانشرحش التصميم ولا بقلل من اهميته ولكن بقول اننا فى الكورسات زى مابنهتم ننقل التصميم ونفيد بيه لازم بردوا ننقل خبرة الموقع.
فالكورس القيم فى نظري اللى بيجمع بين التصميم والتنفيذ - عارف ان شرح الجانب التنفيذي ادواته قليله واصعب فى الشرح ولكن باذن الله نحاول نقرب الشرح من اللى بيقابل المهندس فى الموقع باذن الله.
طيب نبدأ بقى ندخل فى الكورس بتاعنا باذن الله
الكورس بتاعنا عموما بيتكلم عن مجال المقاولات والاستشارات الهندسية والمجال دا مجال واسع جدا ومعلوماته كتيره جدا ويختلف من واحد لواحد فى التصميم والتنفيذ لان فيه مدارس وكلهم صح طالما تحت مظلة حاجه اسمها الكود.
طيب هى الحكاية هتبدا ازاى هتبدأ باننا عندنا مشروع المشروع دا بيبدا ازاى - بيقى فيه واحد عندو فلوس الواحد دا مش شرط يكون فرد ولكن ممكن يكون مؤسسة او منظمة او فرد او الحكومة او مجموعه مشتركين مع بعض فى مشروع ايا كان المهم الواحد دا اسمه المالك عاوز يعمل مشروع والمشروع دا لازم له ارض لبناء المشروع فممكن المالك يبقي عنده ارض المشروع وممكن من البداية عاوز مكتب هندسي يرشحله مكان لمشروعه بعد معرفة نوع المشروع او ممكن يبقي المالك اكثر من فرد بحيث واحد يدخل بالارض والاخر يدخل بالبناء المهم الحمد لله لاقينا الارض المناسبة للمشروع وباقى دلوقت ابدا المشروع.
فعشان ابدئه لازم له بعض الترتيبات المهمة جدا عشان يبقي مشروع هندسي جيد ومحترم ولكن المالك معندوش اى تخصص فى المجال دا وبالتالى محتاج حاجه اسمها نائب المالك ودا بيبقي مكتب هندسي يخطط للمشروع من بدايته بناءا على اوامر ومتطلبات واراء المالك ولكن خد بالك ان مش كل المشاريع بيبقي فيها نائب مالك ولكن المشاريع الكبيره بس اللى بيبقي فيها نائب مالك لكثرة المهمات اللى المالك عاوزها وكثرة الاموال اللى يجب السيطره على طرق صرفها بشكل سليم وفى مكانها المناسب طيب نائب المالك دا - وظيفته ايه - وظيفته انه يركز على الجانب الادارى والمالى بالاضافة للجانب الفنى للمشروع ولكن الجانب الفني بيبقى مسئوليته اكتر على المكتب الاستشاري.
ودا اللى هيدخلنا للخطوه اللى بعد كدا وهى ان بعد مايدخل نائب المالك فى المشروع يبدأ بالتشاور مع المالك فى تلقى بعض العروض الفنية والمالية من المكاتب الاستشارية لاختيار مكتب استشاري وهنعرف يعنى ايه عرض فني ومالى المهم طيب بنجيب مكتب استشارى ليه بنجيبه عشان يقوم بالتصميم والاشراف الهندسي الجيد للمشروع سواء تصميم واشراف معمارى او مدني او كهروميكانيكال.
ففى النقطة دى اما المالك ونائب المالك يختاروا مكتب استشاري عام يقوم بالتصميم والاشراف لكل الاقسام معمارى ومدنى وكهروميكانيكال او يختاروا مكتب استشارى يقوم بعمل التصميم والاشراف المعمارى فقط ومكتب اخر متخصص فى الاعمال الكهروميكانيكية يقوم بعمل التصميم الكهروميكانيكال او يختاروا مكتب يختص بالتصميم المعمارى والمدني واخر للتصميم الكهروميكانيكال واخر للاشراف المعمارى والمدنى واخر للاشراف الكهروميكانيكال يعنى يبقى فيه اكتر من مكتب استشارى فى المشروع - اقلك اه ممكن يبقى فيه اكتر من مكتب استشارى فى المشروع لان بيبقى قدام المالك ونائب المالك فى المشروع سيناريوهات كتيره فى ادارة المشروع للوصول لافضل نتيجه واللى بيحكم ويختار بيه المالك ونائب المالك السيناريوا الهندسي الافضل هي العروض الفنية والمالية التى يتم تقديمها من المكاتب الاستشارية طيب ممكن حد يسال سوال مهم هو دا كويس ان يبقى في نفس المشروع مكاتب استشارية متعدده الاجابه طبعا كتنفيذ السيناريو دا بطريقة سليمه صعب يعنى لا يفضل ذلك عشان بيقي مشاكل كبيره فى التنسيق والتواصل بين الاقسام وبعضها سواء فى مرحلة التصميم او الاشراف والتنفيذ ومشاكل التنسيق بين الاقسام بتبقي مشاكل كبيره مش صغيره.
ولكن فى حالة ولكن المالك ونائب المالك اذا لقوا السيناريوا دا هو اللى هيحقق الهدف الهندسي المطلوب وخلينا نحط تحت الهدف الهندسي دا خط لاحد مانوضحة المهم لو السيناريوا دا الخاص باكتر من مكتب استشارى هيحقق الهدف الهندسي فهيختاروا السيناريوا دا من غير مايخدوا فى اعتبارهم مشكلة التنسيق بين الاقسام ولا صعوبة تحقيق ذلك بنسبة 100 % وبالتالى فى الحالة دى لازم كل الاقسام تاخد بالها انها منسقة كويس جدا مع بعض.
المهم نرجع لحكايتنا بعد ما تم اختيار المكتب او المكاتب الاستشارية اللى هتبقى فى المشروع بيقوم المكتب الاستشارى بالتصميم المعمارى والفرش اولا طبقا طبعا للشكل اللى المالك عاوزه فناحية الشكل بتبقى مهمه جدا للمالك والتصميم المعمارى طبعا مش سهل دا بياخد المشروع عبارة عن ارض فاضية ويبدأ يتخيل الشكل اللى المالك عاوزه ويصممه وبعد كدا يتم اعتماد التصميم من الاستشاري المالك ونائب المالك وبعد كدا يروح التصميم المعمالرى دا للاستشارى المدني عشان يبادأ يحدد الأساسات والأعمده وكل مايلزم لحمل المبني وما بداخله مع الأخذ فى الإعتبار الأحمال الكهروميكانيكية سواء معدات أو مواسير أو شبكات وغيره.
طيب هيعرفها منين طالما لسه التصميم الكهروميكانيكال لسه ماتعملش اقولك ان فيه سياناريوهات مختلفة ايضا فى النقطة دى والسيناريوا الاول هى ان التصميم المعمارى بيروح للاستشاري المدني والكهروميكانيكال فى نفس الوقت بحيث يتم عمل التصميمين والتنسيق بينهم والتبادل للمعلومات الخاصة بالتصميم حتى يصدر نسخه نهائية من التصميمين فى نفس الوقت بعد تبادل المعلومات التصميمية بينهم والسيناريوا الاخر وهو ان الاستشاري المدني هيعمل تصميم مبدأي وليس نهائي ويتم إعتماده من المالك ونائب المالك بشكل مبدأى وبعد كدا ياخد استشاري الاعمال الكهروميكانيكال التصميم المعماري والمدني لعمل التصميم الكهروميكانيكال وبعد الانتهاء منه واعتماده من المالك ونائب المالك يتم تقديم التصميم الكهروميكانيكال الى الاستشاري المدني لعمل التصميم المدنى النهائي واعتماده.
وبالتالى كدا عندنا 2 سيناريوا ممكن نشتغل بيهم بس انا افضل السيناريوا الاول بانهم الاثنين يشتغلوا مع بعض فى نفس الوقت لان فى الحاله دي بيبقي التنسيق بين الاقسام افضل وهنا يجي دور التنسيق بين الاقسام (Coordination) اللى اشارنا له من شويه وانه فعلا بيبقي اسهل وفعال جدا فى حالة ان مكتب واحد هو اللى بيعمل التصميم المعماري والمدني والكهروميكانيكال.
طيب نرجع بقي نكمل الحكاية بتاعتنا وهى ان بعد مايتم اختيار الاستشاري الخاص بالتصميم والاستشارى الخاص بالاشراف وان ممكن يكونوا الاثنين مكتب واحد زي ماقلنا قبل كدا يأتي مرحلة اختيار المقاول اللى هيقوم بتنفيذ المشروع على ارض الواقع يعنى الشركة اللى بتنفذ المشروع دي المقاول والمقاول اللى بياخد المشروع كله سواء معماري ومدني وكهروميكانيكا دا بيتسمي مقاول عام وممكن المقاول العام يجيب تحته مقاول باطن يعنى بياخد منه جزء ينفذه ودا بيقي شركة صغيره بتاخد بتاخد TRADE معين وتخلصه وتعامل المقاول الباطن بيكون مع المقاول العام فقط والمقاول العام هو اللى بيبقي منه للاستشاري.
لاحد هنا ونلخص اللى فات
ليست هناك تعليقات:
إرسال تعليق