المحاضرة الرابعة
أولا: الفيديو الخاص بالمحاضرة
ثانيا:الحديث الخاص بالمحاضرة
السلام عليكم ورحمة الله وبركاته
أهلا وسهلا بيكم فى قناة [ MEP SCHOOL ] [ ميب سكول ]
MEP_SCHOOL#
#ميب_سكول
#المقاولات_والاستشارات_الهندسية
#مستندات_المشروع
ان شاء الله انهارده هنكمل حكايتنا في مجال المقاولات والاستشارات الهندسية - أتمنى ان كل المهندسين يكونوا متابعيين معايا اول باول فى المحاضرات اللى فاتت ويكونوا مشوا معايا خطوه خطوه ببساطه بحيث نكون فهمنا بداية المشروع وازاى المقاول بيفكر فى الموقع وهو لسه ارض فاضيه فكنا بنتكلم عن تدرج مستندات المشروع من اول ما المقاول بينزل الموقع وكنا بنقول ان المقاول بيتفق مع الاستشاري على خطوات تسليم المشروع فى كل نظام من خلال حاجه اسمها ITP وبعدين بيبدأ يدخل فى شرح للاستشاري ازاى هيركب الانظمة بتفاصيل التركيبات المختلفة من خلال حاجه اسمها MOS وبعدين بيشرح هيختبر الأنظمة ازاى من خلال حاجه اسمها TEST PROCEDURES وبعدين بيتفق مع الاستشاري لما يجي يستلم كل مرحلة من مراحل التركيبات المفروض هيستلم ازاى وهيبص علي ايه بحيث يجهزهاله فهيقله فى المرحلة الاولى هتسلم كذا وفى المرحلة التانية هتسلم كذا وفى المرحلة النهائية هتستلم كذ ودا بيبقي من خلال حاجه اسمها CHECK LIST وقلنا والاستشاري بيعتمدها لازم ياخد فى اعتباره المفروض المالك متفق هيدى للمقاول نسبه كام على كل مرحلة من مراحل التركيبات وكنا وقفنا لاحد هنا فى المحاضره التالته وان شاء الله هنكمل دلوقت حكايتنا عن المستندات وازاى المقاول بيفكر فبعد كدا المفروض المقاول يعمل ايه عشان يبدا شغل فعلى في الموقع لان كل اللى قلناه دا كلام على ورق ولكن طبعا مهم طوال المشروع بحيث يرتب الشغل ويمنع المشاكل بين المقاول والاستشاري لان كل حاجه بيبقي اتفقوا مع بعض عليها من البداية طيب ايه بقى تانى مطلوب عشان يبدا شغل لازم هيحتاج اكييد يشتغل على لوحات تنفيذية للاعمال واللوحات دي اسمها SHOP DRAWING ودي اللوحات اللى هيبدأ يشتغل بيها في الموقع بعد طبعا ما يعتمدها من الاستشاري طب ممكن حد يسأل سؤال هنا طب وانا ليه ما اشتغلش باللوحات التصميمية على طول أقولك ماينفعش لكذا سبب - اول حاجه ان اللوحات التنفيذية دى بتتعمل بعد ما المقاول بينزل الموقع ويشوف هيمشي مساره ازاى يعنى هيحود هنا عشان فية كمره وهكذا والسبب التاني ان اللوحات التنفيذية بتكون اكتر تفصيلا ووضوحا سواء LEVELS اللى بتوضح مكان التركيب بالضبط والميول النهائية نتيجة المتاح فى الموقع وبردوا بيوضح الاطوال والاماكن بالتفصيل والاقطار العمليه المعروفة في السوق اللى الفنى فاهمها بالإضافة لتفاصيل التركيبات بالاضافة لنوع الرسم نفسه هيختلف - فمثلا لو شكل ماسوره في التصميم بيبقي سنجل لاين وبيبقي عليه القطر الداخلى ومابيبقاش عليه ليفل ولكن في الشوب دراونج الماسوره بتبقي مرسومه DOUBLE LINE وبتبقى عليها القطر NOMINAL المعروف في السوق وبتبقي عليها الليفيلات الناتجه عن التنسيق مع باقى الأقسام على ارض الواقع ودا اللى هيودينا للنقطة الاخيره وهى ان الشوب دراونج بيكون بعد ما تم التنسيق مع باقى الأقسام على ارض الموقع طيب كدا بعد المقاول ما انهى الشوب دراونج هيقدمه للاستشاري عشان الاستشاري يراجعه كويس جدا باللوحات التصميمة ويتاكد ان المقاول اتبع كل المسارات التصميمة ولو غير ولم يخل بالغرض التصميمى فكدا مفيش مشكله ولكن خلى بالك كاستشارى من نقطه مهمه هنا المقاول احيانا بيحاول يزود فى الامتار والكميات عن طريق انه بيطول المسار ويروح هنا ويرجع هنا وغيره وعشان كدا لازم الاستشاري ياخد باله كويس من ان التغيير اللى اتعمل كان بسبب فنى مش من غير سبب وهل السبب دا مقبول ولا مرفوض المهم بعد كدا يحط الاستشاري ملاحظاته على اللوحات الملاحظات دي بتبقي خاصة بالتركيبات بالإضافة لبعض الملاحظات الأخرى اللى بيحطها على اللوحه عشان مهندس التنفيذ في الموقع والفنيين ياخدوا بالهم منها خلال التنفيذ.
المهم نرجع لموضوعنا - طيب دلوقت المقاول بقى معاه لوحة تنفيذية شوب دراونج معتمده وعاوز ينفذ هينفذ باية اكييد هيحتاج خامات عشان يبدا التركيبات طيب هيجيب ماتريال او خامات اللى هو عاوزها على طول اكييد لا لازم اعتمدها الاول من الاستشاري طيب هقدمها ازاى هقدمها عن طريق انى كمقاول هبعت ترانسميتال اعتماد مواد يعنى ماتريال سابميتال ودا كدا ترانسميتال جديد عرفناه طيب هو المقاول بيختار هيعتمد الماركة بناءا على ايه الراجل بيبقي عنده المواصفات الفنية المطلوب تكون موجوده فى الخامه دي وبيبقي عنده اكتر من ماركه تحقق المواصفات دي فبيبعت طلب عرض سعر من خلال انه بيبعت للموردين المعتمدين العرض الفنى اللى بيبقي فيه المواصفات الفنية الخاصة بالخامة المطلوبه والكميه المطلوبه من الخامة دى وبناءا على كدا المورد بيبعتله عرض السعر وبالتالى المقاول بيعمل كدا مع اكتر من مورد لنفس الخامه عشان يوصل لافضل سعر وهنا يبقي عرف الماركة اللى هيقدمها للاعتماد ويقوم مقدمها – طيب بيبعت في الطلب دا ايه بالضبط اول حاجه بيبعت الداتا شيت او الكاتلوج ويعلم على الموديل اللى هو عايز يعتمده تانى حاجه بيبعت حاجه اسمها compliance sheet ودي بيبقى فيها عرض للخصائص المطلوبه في الخامة طبقا لمواصفة المشروع وقصادها الخصائص الفعلية الموجوده فى الموديل اللى مختاره وموجود الداتا شيت بتاعته بحيث لو الاثنين متطابقين يبقي comply طيب تالت حاجه بيبعت SAMPLE من الخامه دي عشان الاستشاري يبص عليها ويشوف الجوده بتاعتها رابع حاجه بيبعت مثال من حاجه اسمها شهادة المنشأ ودي شهادة بتبقي فيها بيانات الخامه وبتبقي معتمده من الغرفة التجارية للبلد اللى جاي منها الخامه ودا اثبات ان الخامه دى جت من البلد بتاعتها المطلوبه من الخارج – خامس حاجه بيبعت مثال من حاجه اسمها PACKING LIST ودي معناها بوليصه الشحن ودى بتبقى عبادة عن حصر بالخامات اللى تم تعبئتها عند الشحن للخامات من بلد المنشأ من برا ودا بيبقى دليل بردوا ان الخامه دى تم شحنها وتعبئتها من الخارج ودى بيبقي فيها تفاصيل اكتر عن الخامات بحيث لو شهادة المنشأ مش واضح فيها البيانات تفصيلية.
طيب الاستشارى بقى راجع كل اللى اتبعت بالمواصفات الفنية الخاصة بالمشروع وحققت المطلوب واعتمد الخامات على الترانسميتل فبعد كدا بيقوم مهندس المقاول اللى فى الموقع عامل حاجه اسمها MR يعنى MATERIAL REQUEST للمكتب الفنى والحسابات يعنى طلب توريد الخامات وساعتها بيقوم المكتب الفني والحسابات عاملين حاجه اسمها امر توريد وباعتينه للمورد وطبعا يدفعلة تمن الخامه المطلوبه وبالتالى يستلمها طيب المقاول استلم الحاجه دى من المورد وجابها المخازن الموجوده فى الموقع يبدا بقى يسحب منها ويبدا شغل على طول لا طبعا لازم يسلم الخامات دى بحاجه اسمها MIR يعنى ماتريال انسبكشن ريكويست يعنى طلب فحص مواد او خامات - طيب ليه مابيركبش على طول لان طبعا ممكن تكون الخامه اللى جت مختلفه عن النوع المعتمد ويمكن تبقي نفس النوع المعتمد بس ورقها مش موجود - طب وهو ايه الورق اللى المفروض يبقى معاها الورق اللى المفروض يبقى مع الخامه اكترمن حاجه اول حاجه لازم يبقي مع الخامه الفاتوره المختومة من المورد المعتمد عشان دا اثبات ان انت جبت الخامه من مورد اوثوريذد اللى هو وكيل معتمد للماركة المعتمدة بالخارج يعنى مايكنش المقاول جايب الخامة بطريقة مش صح او سارق الخامه من اى مكان وجايبها او جايبها مضروبه بطريقه او باخري
طيب تانى حاجه لازم يبقى معاها شهادة المنشأ بحيث دا اثبات ان الخامه دى جت من البلد بتاعتها المطلوبه فى الاعتماد.
طيب تالت حاجه لازم يبقي معاها PACKING LIST ودا بيبقى دليل بردوا ان الخامه دى تم شحنها وتعبئتها من الخارج ودى بيبقي فيها تفاصيل اكتر عن الخامات.
طيب رابع حاجه لو الخامه مطلوب معاها فى اعتماد الاستشاري شهارات اختبار او شهادات معايره او غيره فلازم دى بردوا تكون موجوده مع الخامه عند التوريد طيب كدا عرفنا ليه المقاول لازم يسلم الاستشارى رسمى الخامه قبل ما يشتغل بيها عشان يتاكد من كل اللى قلناه.
وبالتالى انا كدا كمقاول اعتمدت طريقة التركيب واعتمدت اللوحات التنفيذية واعتمدت الخامات اللى هاستخدمها وسلمت الخامات للاستشاري فى الموقع وبالتالى كدا هقدر ابدا اقلك لا لان لازم اعتمد حاجه اسمها START NEW ACTIVITY بحيث اقول للاستشاري انا هبدا اشتغل شغل مكافحة الحريق مثلا فى الجزء كذا فى المشروع وبالتالي انا كاستشارى اشوف المكان جاهز تشتغل فيه سواء جاهز كاعمال مدنية ومفيش حد تانى شغال فى المكان دا بحيث يبقي فيه تنسيق كامل بين الاعمال يعنى مثلا مايبقاش حد بينقل معدات ثقيلة فى مكان وفى نفس المكان يقلى انا عاوز اشتغل مكافحة حريق فساعتها اقله خلى بالك فى ناس بتنقل معدات ثقيلة هنا واختار مكان تانى دلوقت لاحد مايخلصوا او ممكن المكان اللى بيقلى عاوز اشتغل فيه دا مايكونش خلص اعمال مدنية بحيث تبدأ تشتغل فيه بانك تعلق تحاميلك فى السقف وهكذا وخلى بالك بردوا المدنى بيحتاج اعتماد استشاري الكهروميكانيكال فى الصب وبيعمل حاجه اسمها CONCRETE RELEASE وبيقدمها المقاول المدنى للاستشاري الكهروميكانيكال بحيث لو عاوز يصب على مكان فيه اعمال كهروميكانيكال بحيث لازم استشاري الاعمال الكهروميكانيكال يقول انه استلم شغله في المكان دا قبل ما يتصب.
طيب كدا احنا فهمنا ليه المقاول بيبعت استارت نيو اكتيفيتي بحيث لو اعتمدتها من الاستشاري يبدا ساعتها يقدر يبتدي شغل طيب المقاول بدا شغل فى المكان اللى اعتمد يبتدي فيه الشغل طيب كدا بقى هيبدأ المقاول في التجهيز والتفصيل للخامات ويبدأ يركبها على المراحل اللى اتفق عليها مع الاستشاري اللى موجوده في التشيك ليست المعتمدة وبالتالي لما يخلص المرحلة الأولى من التركيبات فرست فيكس هيبدأ بقي يسلم التركيبات بحيث مهندس الموقع يخلى مهندس الجوده يستلم منه الشغل ويقدم ايه بقي للاستشاري عشان يستلم هيقدم اكييد ترنسيميتال اسمه طلب فحص اعمال ودا اسمه WIR وبالتالي الاستشاري هيبدأ ينزل الموقع على التركيبات دى ويدى كود وملاحظات وهكذا
وهنا فيه ملاحظة مهمه وهى ان اى مستند بيتقدم للاستشارى بيبقي مرفق له كل تاريخه قبل كدا بمعنى لو مثلا هتقدم WIR لازم ترفقله SNA المعتمده لنفس المكان اللى عاوز تسلم فيه تركيبات
ولازم بردوا ترفقله SHOP DRAWING بالاعتماد بتاعها لنفس المكان ولو فيه اى تعديل تم خلال التركيبات بتعمله على الشوب دراونج وتعلم علية ودا بيبقي اسمه RECORD DRAWING.
طيب وايه تاني لازم يرفقه – لازم يرفق التشيك ليست المعتمده
وبردوا لازم يرفق اى شهادات مطلوبه زي مثلا لو فيه ريكويست اختبار ومطلوب شهادات المعايره للعدادات وزي لو فيه THIRD PARTY COMPANY مسئولة انها تنفذ حاجه فى الريكويست ولو ريكويست لحام مثلا لازم يرفق شهادات اللحامين وهكذا.
طيب هيبعت ايه تانى مع الدبيو اي ار هيرفق MIR لكل الخامات المستخدمة فى الريكويست اللى طبعا استلمناها بالماتريال سابميتال اللى كان مرفق لل MIR .
واخر حاجه المفروض يرفقها لو فيه اى اصدار سابق للطلب فحص الاعمال لازم يرفقه للاصدار الجديد من الطلب.
وهكذا بحيث الاستشاري يتاكد ان اعتمدت كل المراحل السابقة ويعرف ايه الملاحظات السابقة.
طيب لاحد هنا بقي ونقف ونبقي انهينا المحاضرة الرابعة عشان المعلومات ماتبقاش كتيره مره واحده عشان الناس تقدر تستوعب بسهولة باذن الله وكدا مستمرين الحمد لله فى دورة حياة المشروع من ناحية المستندات بحيث نكون عرفنا تسلسلها ووظيفة كل مستند.
وان شاء الله هنعرف المحاضره الجايه ان كان فى العمر بقيه الاقسام الموجوده فى المشروع وهنبدا نشرح الاقسام لبدء انشاء المبنى وبعد كدا بقي نبدأ نتعمق فى كل قسم من الناحية التصميمية والناحية التنفيذية باذن الله.
وفى النهاية الحمد لله على ماقد كان وما هو كائن وما سيكون
دمتم فى رعاية الله وأمنه
والسلام عليكم ورحمة الله وبركاته
ثالثا: الملفات التى تم إستخدامها فى الشرح
(جميع روابط التحميل من موقع Mediafire لسهولة التحميل بإذن الله)
ليست هناك تعليقات:
إرسال تعليق