المحاضرة السابعة | نبذه مختصرة عن مكونات وانظمة التكييف ومكافحة الحريق والوقود والمولدات بالمبني
المحاضرة السابعة
أولا: الفيديو الخاص بالمحاضرة
ثانيا:الحديث الخاص بالمحاضرة
السلام عليكم ورحمة الله وبركاته
أهلا وسهلا بيكم فى قناة [MEP SCHOOL]
ميب سكول
#MEP_SCHOOL
#ميب_سكول
#المقاولات_والاستشارات_الهندسية
ما زلنا بنتكلم في مجال المقاولات والاستشارات الهندسية وكنا فى المحاضرة اللى فاتت اتكلمنا عن مكونات اى مبني واقسام اى مشروع وقلنا نبذه مختصره عن كل قسم وكل مكون بحيث دا يبقي مدخل كعناوين بس لكل قسم عشان نبدأ نعرف كل قسم عباره عن ايه او بيتكلم عن ايه بحيث فى المحاضرة دى هنبدأ نتكلم عن كل قسم ببعض التفاصيل شويه لاحد مانتكلم بالتفصيل من الناحية التصميمية والناحية التنفيذية باذن الله.
طيب مبدئيا فيه سؤالين اتسألتهم الفتره اللى فاتت واحب اوضح اجابتهم دلوقت واول سؤال هو انا ليه بشرح الاقسام كلها فى الكورس دا او هو الكورس دا بيشرح ايه بالضبط فالاجابه ان الكورس دا انا بشرح فيه كل اللى عندى من معلومات فى كل الاقسام بترتيب معين بحيث المعلومات تدخل دماغك بالترتيب الصح باذن الله بحيث تبقى عارف حاجات كتيير مهمه فى كل الاقسام بحيث تبقى مهندس متمكن فى اى مكان تشتغل فيه.
طيب السؤال الثانى هو انا ليه اعرف اى حاجه عن قسم مش قسمي او شغل مش شغلي يعنى ليه كل الاقسام اللى اتكلمنا عنها المحاضرة اللى فاتت يعنى هو انا عشان شغال فى مجال MEP لازم اعرف كل الاقسام ليه هقلك دا اللى هيميزك انت كمهندس عن غيرك ان تبقي عارف معلومات عن كل الاقسام ودا هيفيدك فى شغلك اكييد ودا لان الاعمال كلها مشتركة مع بعضها فى التركيبات فاكييد هتلاقى مشاكل واخطاء بين قسمك وشغلك وبين الاقسام التانية وهنا بيجي دور المعلومات اللى تعرفها عن الاقسام التانية فى انها بتساعدك فى ايجاد الحلول للمشاكل حتى لو هتحل المشكله فى القسم اللى مش قسمك لان دا بيعود عليك بانك بتتميز بين المهندسين الموجودين معاك فدا طبعا اول سبب.
تاني سبب ان انت كمهندس فى تخصصك لما تعرف تخصصات اخري فدا مهم عشان تحل مشاكلك معاه بسهوله لان فيه ناس فى الاقسام الاخري بتحاول تستغل ان انت ماتعرفش حاجه فى القسم بتاعها وفيه مشكله بين شغلك وشغله تداخل مثلا ماسورة مع DUCT او تريهات تحت ماسورة مياه وهكذا فلو انت مش عارف حاجه اللى قدامك فى القسم التانى هيقك انا مش هفك شغلى مثلا لان انا فنيا صح او لان انا لو غيرت مساري هبقي فنيا غلط وبالتالى لو انت عندك حلول فى قسمك او قسمه هتبدأ تقدمهاله وتقله مثلا دا فنيا عندك مش غلط وتتناقش معاه وهكذا من المشاكل اللى بيظهر فيها دور معرفتك ومعلوماتك عن الاقسام التانية وهكذا.
أما ثالث سبب وهو ان انت لما تبدأ تعرف الانظمة مع بعضها هتبدأ تحس بان الانظمة دي معظمها بتكمل بعضها فى المبنى يعنى لو ادينا مثال بسيط بشكل عام للتداخل بين الاقسام فهنلاقي الانظمة اللى بتدخل فى الحريق و Fire Scenario مثلا فهنلاقى قسم المعماري والمدني مسئول عن تحقيق الfire safety للمبنى لتجنب حدوث الحريق والتجنب انتشار الحريق وعمل خطة الاخلاء ساعة حدوث الحريق زي ما قلنا قبل كدا وهنلاقي بردوا قسم مكافحة الحريق اللى تبع قسم ميكانيكا بيعمل الانظمة اللى بتطفي او بتخمد او بتكافح الحريق ودا عشان لو الحريق حصل النظام الخاص بيه يشتغل ويكافح الحريق وهنلاقى ان دا مرتبط بنظام انذار الحريق اللى تبع قسم كهرباء وقسم الانذار دا اللى بيراقب المبني كله بحساساته بحيث لو الحريق حصل يدي انذار فى المبنى ويتم عملية الاخلاء والتعامل مع الحريق بالاضافة الى تنفيذ حاجه اسمها الفاير سيناريو (Fire Scenario) وهنلاقي دا مربوط على نظام الاسكادا (Scada) أو (BMS) ودا بردوا تبع قسم الكهرباء لان زي ما قلنا ان نظام الاسكادا او (BMS) بيراقب كل الانظمة عشان يراقب وياخد اكشن معين وهنلاقى أيضاً تركيب مراوح سحب الدخان اللى بتشتغل لما الحريق بيحصل دا اللى بينفذه قسم التكييف وبالتالى قسم التكييف اللى تبع قسم ميكانيكا بيدخل فى بردوا الفاير سيناريو (Fire Scenario) عشان مراوح سحب الدخان بالاضافة كمان لمعدات تكييف اللى هتفصل اوتوماتيك ساعة حدوث الحريق وهكذا وبالتالى هنلاقى ان كل الانظمة بتتداخل مع بعضها فى حاجات كتيره مهمه وبالتالى لازم تعرف ولو معلومات بسيطة بقدر كافي يخليك تقدر تتعامل مع الاقسام الاخري وتفهم الدنيا ماشية ازاى.
طيب كدا الحمد لله عرفنا ليه احنا لازم نعرف ونتعلم ولو القليل عن كل الاقسام الاخرى بالاضافة لقسمك اللى انت فيه.
فدلوقت بقى هنكمل اللى ادينا نبذه عنه فى المحاضرة اللى فاتت عشان ناكد على حته ان انت فهمت مبدئيا كل قسم وكل مكون من مكونات المبني بيتكلم عن ايه وبيختص بأيه فى المبنى وايه وظيفته بالضبط.
فاول حاجه كنا اتكلمنا عليها فى قسم الميكانيكا هى انظمة التكييف المركزي والانظمة دى بتختلف من نوع لاخر لان انظمة التكييف كتيره ومتعدده وبتختلف على حسب التطبيق اللى بتستخدم فيه فالانظمة دى بتتنوع على حسب طريقة التبريد هل التبريد فيها بالمياه ولا بالهواء وعموما لو مثلا هنتكلم عن نظام منهم وليكن النظام اللي التبريد فيه بالهواء فهنلاقيه بيشتمل على اعمال الCOOLING TOWER اللى هي ابراج التبريد اللى بتستخدم الهواء لتبريد المياه خلال دايرة CONDENSER وبالتالى هتروح المياه البارده دي لل CHILLERSبحيث يتم التبريد الكامل لها من خلال الفريون عشان اوصل المياه البارده لدرجة حرارة التبريد المطلوبه وبعد ما اوصلها لكدا ابدا اوزعها علي المعدات اللى بنستخدمها فمثلا لو عندنا AHU وبردوا لو فيه FCU نوصل عليها مواسير المياه وبالتالى فى AHU و FCU بيتم تبريد الهواء بالمياه الخارجه من التشلر وبالتالى بيخرج الهواء البارد المكيف دا وبيتم نقله بقي خلال DUCT او صاج مجلفن طبعا بمواصفات معينه وبيوصل الهواء دا لمخارج الهواء AIR OUTLETS بانواعها المختلفه وبكدا يوصل الهواء دا للمكان لتكييف المكان. وطبعا فيه انظمة تكييف اخري منها الPACKAGE UNIT ومنها ال SPLIT UNIT وغيره من انظمة التكييف بالاضافة طبعا لانظمة التهويه اللى هنعرفها بالتفصيل باذن الله لكن اللى عاوزك تعرفه دلوقت فقط هو ان أنظمة HVAC ضمن قسم ميكانيكا والانظمة دي بتختص ب انظمة التكييف والتهويه وسحب الدخان.
تاني حاجه تبع قسم ميكانيكا وهو قسم مكافحة الحريق ودا بردوا فيه انظمة اطفاء مختلفه ومتنوعه على حسب ايه التطبيق اللى انا بطفية فبيبقى فيه انظمة مكافحة الحريق بالمياه ودي بنغطي بيها مثلا المكاتب وغيره من التطبيقات المختلفة ودي بتبقي ببساطة عبارة عن مضخات مياه مكافحة الحريق اللى بتخلي المياه مضغوطة داخل المواسير وطبعا النظام دا بيختلف على حسب التطبيق بردوا هل هنستخدم النظام الرطب اللى هو wet system ولا النظام الجاف dry system وطبعا بيتنوع ايضا عن طريق المخارج اللى بتخرج المياه للاطفاء من خلالها ومنها النظام الاوتوماتيكي اللى هو الرشاشات (sprinkler systems) والنظام اليدوي زي كبائن الحريق وغيره طبعا من الانظمة المختلفة اللى لسه هنشرحها بالتفصيل وبردوا من ضمن انظمة مكافحة الحريق انظمة مكافحة الحريق بالفوم الرغوي ودا بردوا بيختلف فى اختيار نوعه وتركيزه ودرجة كثافتة وتمدده على حسب التطبيق ودا بيستخدم غالبا مع اى حاجه فيها وقود fuel system وبيبقى فيه بردوا نظام رشاشات مفتوحة ومغلقة على حسب هنستخدم حاجه اسمها deluge system ولا pre-action system وبردوا فيه مخارج اخري غير الرشاشات لاخراج water- foam mixture ودا فى حالة high expansion foam mixture وهكذا وفيه طبعا انظمة اخري لمكافحة الحريق زي انظمة مكافحة الحريق بالغازات والغازات دى اشهرها حاليا فى الاستخدام هى انظمة غاز ثانى اكسيد الكربونco2 وغازات الclean agent زي الfm-200 وال novec وغيره من الانظمة زي الايروسول aerosol وطبعا على حسب الاستخدام فنظام غاز ثانى اكسيد الكربون مثلا فدا هيستخدم فى حالة غرف الكهرباء اللى مش المفترض يبقى متواجد فيها اشخاص زى غرف الموزعات switch gear rooms وغيره اما انظمة الfm-200 وال novec فدول بيستخدموا فى حالة غرف التحكم اللى بيبقي فيها لوحات كهربا واشخاص وانظمة الايروسول اللى بتسخدم بردوا فى اطفاء لوحات الكهرباء وبردوا فيه انظمة اطفاء اخرى زي fire search , fire trace اللى بيستخدموا اما ثانى اكسيد الكربون او البودره الجافه وهكذا وبردوا فى انظمة تانيه زي انظمة الاطفاء فى الاهواد (hoods) اللى بتسخدم wet chemical وهكذا وطبعا فى وسائل اخرى مهمه واساسية زى الطفايات بانواعها واحجامها المختلفة زي طفايات البودرة الجافة وثانى اكسيد الكربون والفوم وغيره وايضا فيه طفايات اوتوماتيكية بتستخدم وغيرة المهم ان انت لازم تبقى عارف دلوقت ان قسم مكافحة الحريق دا بيبقي مسئول عن أنظمة مكافحة الحريق اللى لسه كنا بنتكلم عليها دلوقت.
تالت حاجه تبع قسم الميكانيكا أنظمة الوقود والمولدات وزى ما عرفنا قبل كدا ان النظام دا مسئول عن توليد الكهرباء والامداد بيها فى حالة انقطاع الكهرباء الرئيسية وزي ما قلنا قبل كدا ان النظام دا مشترك بين قسم ميكانيكا وقسم كهرباء بحيث ان اعمال وتركيبات المولدات وانظمة الوقود المستخدمة فى امداد الوقود لمولدات الطوارىء دي بتكون خاصة بقسم ميكانيكا اما من اول بقى جزء اختبارات تشغيل المولدات واختبار القدرات والسرعات وغيره من الاختبارات للمولدات نفسها فدى بقى بتبقى مع قسم كهرباء وطبعا بقى بالاضافة لاعمال و توصيلات جزء termination اللى بيربط بقى على المحولات الكهربيه transformers ومنه يدى بقى للموزعات الكهربية ومنه بقى للاحمال الكهربيه المطلوبه فكل الدايره دى بردوا تبع الانظمة الكهربية وقسم الكهربا وهندي نبذه مختصرة مثلا على نظام الوقود عشان تبقي عندى خلفية بسيطة فهنلاقيه بيبدأ من اول خزانات الوقود3 الرئيسية اللى بيسموها الخزانات الشهرية (monthly tanks) ود مش معناها ان الخزان بيتملى كل شهر ولكن الوقود دا مابيستهلكش غير لما المولد بيشتغل سواء بقي كاختبارات دورية وخلافة او لو الكهربا قطعت فمش لازم يتملى كل شهر ولكن لازم نشيك عليه كل شهر هل هو مليان ولا لا والخزانات دي بتتملي وقود عن طريق عربيات الوقود او باى طريقة اخري زي مضخات تستخدم للمساعدة فى ملو الخزانات وبعد كدا غير الخزانات طبعا باكسسوارتها المطلوبه من فتحات تهوية vent وفتحات الخاصة باخذ القراءات مانوال (يدويا) وغيره بالاضافة بقي لمضخات الملو للخزانات الرئيسية والخزانات اليوميه بالاضافة بقى للمواسير اللى بتنقل الوقود فى النظام كله بالاضافة طبعا للخزانات اليومية للوقود (daily tanks) ودي اللى بتبقي جنب المولد عشان المولدات تسحب وقود منها وطبعا الخزانات دي لها اكسسواراتها الخاصة من زجاجة البيان والدرين drain او الراجع وطبعا خط الملو وطبعا vent وغيره من الاكسسوارات وبعد كدا بقى بيدخل خط الامداد بالوقود على مرحلة فصل وفلترة للوقود من الماء والهواء وبعد كدا بيدخل الوقود للمولد من خلال المضخة الموجوده بالمولد اللى بتسحب الوقود من الخزان اليومي وهكذا وطبعا بيبقي فيه تركيبات تانية ميكانيكية خاصة بشكمانات المولدات وغيره- اما بالنسبة للتركيبات الكهربية فبيبقي مهندس الكهرباء بيبقي مسئول عن اختبارات المولدات وبتبقي الاختبارات دى عبارة عن بيشوف قراءات الفولت والامبير والتردد والR.P.M ودا بعد طبعا التاكد من درجة الحرارة والضغط لل oil وبيتم اخذ القراءات دى فى حالة starting ,10% , 50% ,full load بالاضافة طبعا انه بيبدأ يختبر المولد فى حالة emergency stop وكل وسائل الحماية الموجوده به لازم يختبرها ويجربها وهكذا فكل دا اللي بيعمله قسم الكهرباء بالاضافه انه مسئول عن التركيبات الكهربية من تريهات وكابلات و البارات وغيره من اول مخرج المولد لاحد مايوصل لمحولات الرفع ومنه للموزعات ومنه للاحمال فكل دا قسم كهرباء اللى مسئول عنه.
وبكدا نبقى انهينا المحاضرة السابعة الحمد لله وان شاء الله المحاضره القادمة نبدأ بقي نكمل شرح باقي الاقسام الخاصة بمجال المقاولات الكهروميكانيكية.
وفى النهاية الحمد لله على ماقد كان وما هو كائن وما سيكون
دمتم فى رعاية الله وأمنه
والسلام عليكم ورحمة الله وبركاته
ليست هناك تعليقات:
إرسال تعليق