المحاضرة الثالثة
أولا: الفيديو الخاص بالمحاضرة
ثانيا:الحديث الخاص بالمحاضرة
ان شاء الله انهارده هنكمل حكايتنا في مجال المقاولات والاستشارات الهندسية - أتمنى ان كل المهندسين يكونوا ركزوا فى المحاضرات اللى فاتت ويكونوا مشوا معايا خطوه خطوه ببساطه بحيث نكون فهمنا بداية المشروع من الاساس بيبدأ ازاى وكنا بنقول فى نهاية المحاضرة اللى فاتت تعالوا بقي ننزل على ارض المشروع اللى هو الموقع وهو لسه ارض فاضيه.
وكنا بنسأل هو مين بقي اللى المفروض هيبقى موجود في الموقع عشان المشروع يتنفذ ولاحد هناكنا وقفنا وان شاء الله هنكمل دلوقت من اول هنا فهيبقى موجود في الموقع الاستشاري اللى هيعتمد ويشرف على التنفيذ والمقاول اللى هينفذ ويقدم كل اللى عاوزه للاعتماد وطبعا اما نائب المالك او المالك او الاتنين وهنا لازم نوضح ان المقاول والاستشارى كل واحد فيهم المفروض ينزل الموقع بكام اختصاص من المهندسين - فبالنسبة للمالك بينزل الموقع بمن ينوب عنه اللى هو نائب المالك ودا شرحناه قبل كدا وعرفنا اختصاصاته ونائب المالك دا بيبقي معاه حد تاني اسمه QA اللى هو QUALITY ASSURANCE ودا اللى بيراقب على جودة تنفيذ المشروع بمعنى هو بيراقب الاستشاري فى استلامه للاعمال ويشوف هل هو بيستلم الاعمال بجوده تنفيذ كويسه ولا بيعدي للمقاول حاجات ولا ايه الدنيا بمعني لما المقاول يقدم طلب تسليم للاعمال فالاستشاري هينزل يستلم وبعد كدا QA هينزل يستلم بعده لتاكيد استلام الاستشاري بجوده صحيحة وال QA دا ممكن يبقي تبع نائب المالك او نائب المالك او المالك اللى جايبه تبع مكتب هندسي اخر - طيب كدا عرفنا مين اللى تبع المالك اللى بيبقي موجود فى الموقع - طيب بالنسبة للأستشاري بقي - فالاستشاري بينزل الموقع بطاقم مهندسين مكتب فني وطاقم مهندسين إشراف على التنفيذ فى الموقع بمعني الاستشاري او المكتب الاستشاري لازم يبقي فيه ناس مختصين بالاعتمادات يعنى اى اعتمادات مطلوبه يكونوا دول اللى مختصين بمراجعه الاعتمادات الطاقم التاني اللى تبع المكتب الاستشاري دا بيبقي مهندسين الاشراف على تنفيذ الاعمال بالموقع بحيث دول اللى بيستلموا التركيبات والاختبارات من المقاول بعد تنفيذها عشان يتاكدوا ان التركيبات والاختبارات تمت على اكمل وجه وطبقا للشروط والمواصفات الفنية المطلوبة وطبقا لاصول الصناعه.
طيب بالنسبة للمقاول - المقاول بردوا هيبقى نازل الموقع بـكذا تيم من المهندسين فبيبقي عندوا مهندسين مكتب فني ومهندسين جودة ومهندسين تنفيذ في الموقع بحيث المكتب الفني دا اللى بيجهز كل حاجه مطلوبه للاعتماد من الاستشاري عشان يقدمها للاستشاري اما مهندسين التنفيذ بالموقع دول اللى مسؤلين عن الموقع من الصغيره للكبيره بدءا من استلام الخامات والمحافظة عليها ومرورا بتنظيم الاعمال للفنيين خلال مرحلة التركيبات والاختبارات وانتهاءا بتسليم الاعمال للاستشاري اما مهندسين الجودة فدول اللى بيراقبوا على جودة الاعمال بحيث يستلموا الشغل من مهندسين الموقع ويسلم الاستشاري بالاضافة لمهامه الفنية الاخرى مع المكتب الفني من حيث تجهيز بعض المستندات المهمه التى ترتب مراحل التركيبات والتسليمات بالمشروع بالضافة الى التاكيد على جودة التصنيع لبعض الخامات التى يتم توريدها محليا بالاضافة انه لازم يكون ماضي على اي طلب هيتقدم للاستشاري بحيث انه يبقي تم مراجعته من خلاله.اذن الخلاصة ان المكتب الاستشاري له قسمين والمقاول له 3 اقسام وعرفنا طبعا وظيفة كل قسم ودور كل مهندس على حسب مكانه ووظيفته.في ملاحظة بسيطه هنا وهي ان ممكن يبقي كمان تبع المقاول مكتب استشارى يسمي استشاري مقاول ودا المقاول بيجيبه في حالتين وهما لو الالمشروع كبير ويحتاج مكتب كبير يقوم بدور المكتب الفني للمقاول والحالة التانية لو المشروع محتاج يتعمله ري ديزاين او مطلوب المقاول يعمل ديزاين مبداى للمشروع وبيتراجع من استشاري المشروع وبناءا على الاعتماد للتصميم دا بيتعمل الشوب دروانج واللوحات التنفيذية اللى لسه هنتكلم عليها كمان شوية باذن الله.
طيب نيجي بقي للاستشاري ياترى هيبقى في بداية المشروع معاه ايه - هيبقي معاه بس العقد الخاص بالمقاول DESIGN PACKAGE اللى هي عباره عن المقايسه والمواصفة واللوحات التصميمية ودول اللى هيراجع بيهم اى حاجه المقاول عاوز يعتمدها فهيشوف اللى المقاول عاوز يعتمده دا مطابق او بيحقق الشروط المطلوبة الموجوده في الديزاين باكيج والعقد ولا لا وبناءا على كدا بيتم المراجعه وبالتالى لازم الاستشاري يذاكر العقد والديزاين باكيج كويس فى بداية المشروع عشان يقدر يراجع الاعتمادات كويس - طيب و المقاول بقي هيبدأ شغل ازاى.
وهنا بقى هنبدأ نشرح مستندات المشروع والمقاول ازاى بيقدم المستندات دي بحيث تبقي عارف كل المستندات المطلوبه فى المشروع وتعرف كل مستند بيتقدم دا وظيفته ايه وامته بيتقدم فممكن تلاقى على النت ملفات كتيره واسماء كتيره للمستندات دى بس انت كمهندس مش بتبقي فاهم امته المستندات بتتقدم وبتتقدم ازاى وليه ودا اللى هنعرفه باذن الله دلوقت طيب بعد مانشرح المستندات باذن الله هنبدأ ندخل بقى فى كافة الاقسام الخاصة بالمشروع ونبدأ ندخل بقى فى تصميم وتنفيذ كل قسم بالتفصيل باذن الله وزي ماتفقنا هنشرح واحده واحده بكل بساطة.
طيب نرجع بقى نبدا نشرح المستندات الخاصة بالمشروع من بداية المشروع لاحد ما نخرج من المشروع باذن الله. فاول حاجه المقاول بيعملها حاجه اسمها INSPECTION TEST PLAN ايITP - ودي المقاول بيوضح فيها الخطوات اللى هيبدأ يمشي عليها سواء كمستندات فى المشروع يعني خطوات تسليم للنظام يعنى خطوات المستندات بحيث انه هيقول انا هعتمد CHECK LIST الخاصه بالتركيبات وبعد كدا هعتمد START NEW ACTIVITY عشان ابدا شغل وبعد كدا هشرح طريقة التركيب فى METHOD OF STATEMENT للنظام وهعرفك كاستشارى انا ايه المخاطر اللى عندى خلال مرحلة التنفيذ وايه طرق الحماية اللى انا هتبعها وهيكمل توضيح حاجات تانية من المستندات وهكذا وطبعا كل المستندات دي هنعرفها دلوقت بالتفصيل ان شاء الله فى شكل حكايه بسيطة المهم انه فى ITP بيبدا يذكر كل المستندات اللى هيعتمدها بالترتيب وبعد كدا بيتكلم فيه عن الاعمال بحيث يتفق مع الاستشاري من البداية على خطوات التركيبات بحيث يكون مقسمها كبنود فهيقول انا هجيب الخامات وانفذ زي الشوب دراونج وبعد كدا لما اخلص هسلملك التركيبات ويكمل شرح بقي للخطوات لاحد التسليم النهائي للمشروع – طيب بعد مابيقول البنود دي بيجي جانبها وبيوضح موقف كل من المقاول (سواء مهندس جوده أو مهندس موقع) والاستشاري والمالك فى صورة 4 اختيارات لكل بند سواء بند مستندات او بند تركيبات بحيث ال4 حاجات دول بتحدد هل الاستشاري او المالك أو مهندس الجوده للمقاول أو مهندس الموقع للمقاول لازم يوقف الشغل فى النقطة دي ولا المقاول يكمل شغل عادى ومش محتاج الاستشاري فى حاجه طب ايه بقى ال4 حاجات دول اللى بنحدد بيهم طيب معنى كل حاجه فيهم ايه:
Hold point ودي معناها ان اللى عنده النقطه دي انه لازم يشوف البند دا وياخد قرار فيه بان المقاول يبدا فى الخطوة اللى بعدها ولا لسه فى حاجات فى الخطوه دى لازم تخلص.
Witness ودى معناها انى ببعت للى عنده النقطه دى انى فيه بند كذا بحيث لو جه هيشوف البند دا ولو مجاش فبراحته كدا كدا البند هيمشي بس لازم ابلغه.
Surveillance/Monitor ودى معناها ان اللى عنده النقطه دي مجرد لو عاوز يمر على الحاجه يشوفها يعنى مجرد اشراف على الحاجه بس.
Review ودى مراجعه للمستندات بحيث انه لازم يراجع ويمضي عليها.
طيب بالنسبه لكل المستندات اللى هشرحها باذن اللى هنزلها فى وصف المحاضرات بحيث تفتحها وتقراها وتشوف مثال عليها.
نرجع بقى لموضوعنا المقاول هيقدم ITP للاستشاري ازاى - هيتقدم من خلال حاجه اسمها ترانسميتال يعنى طلب اعتماد. وهنا لازم نوقف لحظه عشان نعرف ازاى المقاول بيقدم طلب الاعتماد للاستشاري عشان يعتمد - يعنى طريقة التقديم ازاى:
بكل بساطة المقاول عشان يقدم اي حاجه للمقاول بشكل رسمي بالتفصيل دلوقت باذن الله المهم ان لازم تبقى عارف ان اى حاجه من هذا القبيل بتتقدم من المقاول للاستشارى للاعتماد اسمها ترانسميتال والترانسميتال دا على اختلاف انواعه اللى لسه هنشرحها بيكون رد الاستشارى فيها بحاجتين وهما الاكواد والملاحظات يعنى بيدى للترانسميتال دا كود اعتماد ويحط الملاحظات الخاصة بيه طيب والاكواد دي عباره عن اربع اكواد وهم (a,b,c,d) وكل كود منهم بيوضح موقف الطلب من الاعتماد ف a معناه معتمد بدون ملاحظات و b معتمد بملاحظات لازم المقاول يتبعها وc غير معتمد ولازم يتلافى الملاحظات ويرجع يقدمه تاني للاعتماد وd غير معتمد ولايتم تقديمه مره اخرى للاعتماد ودا فى حالة مثلا لو الاوراق الموجوده فى الطلب غلط أو الحاجه المتقدمة دى غير مصرح لها بالاستخدام فى المشروع بتاعنا وبالتالى بيقلى ماتبعتش الطلب دا تانى لانه مثلا مش فى الفندور ليست او غيره.لازم يقدم الترانسيميتال دا وبيبقى عبارة عن طلب اعتماد اى حاجه المقاول عاوزها يعني طلب اعتماد شوب دراونج او طلب اعتماد مواد او خامات او طلب فحص خامات او طلب فحص مواد او غيره على حسب ما هنشرح كل نوع ترانسيميتال.
نرجع لموضوعنا بقي وهو بعد ما خلاص المقاول اتفق على الاى تى بيي مع الاستشاري واعتمدها الحمد لله بيجي بقى يدخل في تفاصيل تركيب كل نظام على حده بحيث يبعت للاستشاري طريقة التركيب اللى عاوز يشتغل بيها بدءا من وصول الخامه للموقع ويشرح طريقة التخزين وبعد كدا يبدأ يشرح طريقة التركيب اللى هيستخدمها ويشرح كمان المعدات اللى هيستخدمها والشروط اللى هيحققها خلال التركيبات عشان يحقق التركيب الصحيح طبقا لاصول الصناعة بطريقه فنية صحيحه طبقا لتعليمات المصنعين وبعد كدا في النهاية بيشرح الأسس اللى هيتبعها في المخاطر اللى ممكن يتبعها في الموقع خلال التركيبات والتخزين سواء من خلال تقييمه لحجم المخاطر والطرق المستخدمة في الموقع لتفاديها والحمايه للعمال منها.
طيب هيعتمد طريقة التركيب دي في ترانسميتال هيبعته للاستشاري اسمه method of statement or MOS وزي ماقلنا هتبقى عباره عن ماتريال استورنج والمعدات المستخدمة وطريقة التركيب ودراسة المخاطر وهكذا وعشان نوضح الدنيا اكتر هناخد مثال على كدا وليكن المواسير الخاصة باى نظام بيقلى مثلا انا هخزن المواسير فى مخزن متغطي وهحطها بحيث يتم تخزينها بحيث تكون اعلى من الارض عشان المواسير ماتاخدش رطوبة من الارض وتبدأ تصدي طيب دي مرحلة التخزين وبعد كدا هيبدأ يشرح مرحلة التركيب يقول والله انا عندى طريقة التركيب الموضحة فى التصميم وليكن جرووفد وان هركب جرووفد بحيث هجيب مكنة كذا وفى الاقطار من كذا لكذا هنعملها قلوووظ بدون الدخول فى التفاصيل عشان كل دا هنشرحه بعدين ان شاء الله او يقول والله انا هاستخدم طريقة اللحام ويطرح اسبابة وبالتالى الاستشارى ياما يقبل او يرفض او يقبل COST REDUCTION يعنى بنسبة خصم على البند ولو اللحام مقبول هيوضح خطوات التركيب ويقول هجيب المكنه واحط عليها الماسورة وهحقق الشروط كذا فى التركيب وطبعا هييستعين بصور لتوضيح شرحه ولو مثلا المواسير المفروض تبقي مجلفنه يبدا يشرح ترتيب الشغل بحيث هيجيب المواسير الأول وبعد كدا يفصل الشغل وبعد كدا هيوري الاستشاري يعتمد التفصيل وبعد كدا يودي التفصيل مصنع الجلفنه وبعد جدا الاستشاري يفحص الجلفنه وبعد كدا يبدا يركب وهكذ بيبدا يشرح المقاول كل الخطوات اللى هيعملها خلال مرحلة التركيب.
طيب كدا فهمنا تاني ترانسمسيتال هيتقدم للاستشاري طيب المقاول بعدا كدا المفروض هيقدم ايه المفروض يبدأ بقى يدخل في الاختبارات المطلوبه ويتفق بردوا مع الاستشاري عليها بنفس مفهوم التركيبات بس دي المفروض تتقدم في ترانسميتال تانى اسمه test procedures
طيب فيه حاجه تاني مطلوبه بقى قبل البدء في التنفيذ بيبقى فيه اعتماد لشهادات اللحامين لو فيه لحامات او اعتماد لشركات THIRD PARTY لو مطلوبه او اعتمادات لمصانع الجلفنه لو فيه مواسير هتتجلفن وهكذا ودا بيتقدم في ترانسيميتال اسمه اعتماد مستندات ويقعد المقاول يشوف هو عاوز يعمل ايه ويعتمد ما يخصه من الاستشاري طيب ممكن حد يقول ايه الرخامه بتاعة الاستشاري دا كل حاجه عاوز يتدخل فيها دا كدا بيعطل المقاول ويجي على المشروع لا طبعا لان زي ماتفقنا في المحاضرة اللى فاتت ان احنا هدفنا اهم حاجه الجوده وعشان كدا لازم لاستشاري يتاكد ان كل خطوة في المشاريع الكبيره تمت بأفضل جوده حتى لو هيجي دا على بعض الذيادة من الوقت بالإضافة لحاجه تانية وهى ان المجال بتاعنا للأسف بقى فيه حاجات مضروبة كتير فلازم الاستشاري يتاكد من كل خطوة وعشان كدا المالك جايبه المشروع.
المهم بعد الاعتمادات اللى قلنا عليها من شويه بيبقى المقاول بقى عاوز يدخل في تفاصيل التركيبات بحيث يتفق مع الاستشاري ويقله لما تنزل تستلم مني تركيبات كذا لانه خلاص اعتمد طريقة التركيب وعرف هيركب ايه وازاى فهيقله لما تيجي تستلم تركيب كذا هتبص على كذا وكذا وكذا يعنى المطلوب مني اجهزلك كذا وكذا وكذا وخلال كدا يوضح مراحل تسليم التركيبات بمعنى مثلا في المثال بتاعنا لو مواسير هتستلم تركيبات كمرحلة أولى ترميل وتنظيف ودهان برايمر وتعليق الماسورة في مكانها مربوطه باللى جانبها وضبط التحاميل الخاصة بيها تانى مرحلة هتستلم ضغط للشبكة وغسيل تالت مرحلة عمل تشطيب للدهانات اللى احنا بنسميها تاتش اب للدهانات وعلامات ارشادية وهكذا وبالتالي لو الاستشاري عاوز يغير حاجه من دي في الترتيب للاستلام طبعا بيعدل اللى هو عاوزه لان دا بيتوقف على العقد ونسبة المستخلص اللى المقاول هياخدها على كل مرحلة وبالتالي المهم لازم الاستشاري والمقاول يتفقوا على الجزئية دي عشان كدا لازم المقاول يقدم دا للاستشاري عشان يعتمده بحيث لما يجي يسلم التركيبات يرفقله الاتفاق دا عشان لو الاستشاري طلب حاجه ذياده يقله ماحنا اتفقنا من الأول على احنا هنبص على ايه وطبعا دا في الواقع مابيحصلش في الواقع مع انه من حق المقاول طيب الاتفاق اللى حكينا عليه داه يتقدم في شكل رسمي ازاى عشان الاستشاري يعتمده اكيد زي ما اتفقنا في ترانسميتال طيب هيبقي اسمه ايه المره دى هيبق اسمه CHECK LIST.
طيب لاحد هنا بقي ونقف ونبقي انهينا المحاضرة التالته عشان المعلومات ماتبقاش كتيره مره واحده عشان الناس تقدر تستوعب بسهولة باذن الله وكدا مستمرين الحمد لله في دورة حياة المشروع من ناحية المستندات بحيث نكون نعرف تسلسلها ووظيفة كل مستند.
وان شاء الله هنكمل المحاضره الجايه ان كان فى العمر بقيه المستندات والاقسام الموجوده فى المشروع وهنبدا نشرح الاقسام لبدء انشاء المبنى وبعد كدا بقي نبدأ نتعمق فى كل قسم من الناحية التصميمية والناحية التنفيذية باذن الله.
ليست هناك تعليقات:
إرسال تعليق