المحاضرة الخامسة
أولا: الفيديو الخاص بالمحاضرة
ثانيا:الحديث الخاص بالمحاضرة
ان شاء الله انهارده هنكمل حكايتنا في مستندات المشروع الهندسي فى مجال المقاولات والاستشارات الهندسية - أتمنى ان كل المهندسين يكونوا إستفادوا بالمحاضرات بقدر الامكان وحب اعرفكم ان تم اضافة رابط تحميل جميع الملفات اللى شرحتها فى المحاضرات اللى فاتت فى وصف كل محاضرة ويارب تفيدكم ان شاء الله بحيث ان انت تحاول تشوف الحاجات اللى بتتقدم فى الموقع دي بيبقي شكلها ايه وبيشرح فيها ازاى المهندس اللى بيقدم للاستشاري وهكذا.
فكنا فى المحاضرات اللى فاتت فهمنا بداية المشروع وازاى المقاول بيفكر فى الموقع وهو لسه ارض فاضيه وكنا بنتكلم عن تدرج مستندات المشروع من اول ما المقاول بينزل الموقع وكنا بنقول ان المقاول بيتفق مع الاستشاري على بعض المستندات وكنا شرحنا المستندات من اول ITP وMOS و TP و CH.LIST و SD و MS و MIR و SNA و WIR وان كدا المقاول خلص تركيبات واختبارات وسلمها وكنا وقفنا لاحد هنا فى المحاضرة الرابعة.
طيب بعد بقى ما الاستشاري استلم تركيبات ويستمر النظام دا من التسليمات لاحد ما المقاول يخلص كل مراحل التركيبات والاختبارات في كل الاجزاء الخاصة بالمبني يبدأ بقى المقاول يفكر في البدء في مرحلة تجارب التشغيل وبالتالي التشغيل بيحصل للمنظومة كاملة مع بعضها وبالتالى يبدأ يجمع كل طلبات فحص الاعمال لكل مراحل التركيبات في كل الأجزاء الخاصة بالمشروع بحيث يكون جمع كل طلبات الفحص لكل مكونات المنظومة كلها ويقدمها للاستشاري للمراجعه عشان يقول للاستشارى ان هتنقل مرحلة التركيبات اى CONSTRUCTION الى مرحلة تجارب التشغيل اى TEST COMMISSION وفى تجميع طلبات الفحص دى المقاول بيلخص الملاحظات بتاعة الاستشاري اللى في طلبات الفحص كلها ويقله موقفها حاليا من التنفيذ ويقله هل حتى لو مخلصتش دى ملاحظات لا تعوق التشغيل يعنى حاجه اسمها PUNCH LIST هنعملها خلال مرحلة التشغيل بالتوازي بحيث المقاول يقدر يبدا تشغيل وبالتالي هيقدم دا للاستشاري بحيث يراجعها وينزل يعمل walk down فى الموقع ويرد عليه بحيث يقله تمام ابدا مرحلة التشغيل او يقله لا مش هينفع فيه ملاحظات تعوق التشغيل طيب المقاول هيقدم للاستشاري الكلام دا ازاى كالعاده زي ماتفقنا قبل كدا من خلال ترانسميتال طيب اسمه ايه – اسمه TURN OVER PACKAGE يبقي اذن لو اعتمد TURN OVER PACKAGE يبقي كدا يقدر يبدأ فى خطوات تجارب الاختبار والتشغيل يعني معني كدا انه هيبدأ بقي بتسليم الاختبارات الخاصة بالمعدات و تجارب التشغيل للاستشارى لا – ليه لانه لازم يعتمد الاول حاجه اسمها sequence of operation و test procedure for equipment بحيث يشرح فيهم هيختبر المعدات ازاى وايه اللمطلوب تحقيقية للمعدات ويشرح كمان طريقة التشغيل للنظام فى خطوات محدده ومرتبه وبتكون الخطوات دى بمعرفة مورد المعدات عشان خطوات التشغيل دى ماتأثرش على المعدات لو فيها حاجه خطأ فى خطوات التشغيل دي - طيب كدا المقاول هيقدمهم فى ترانسيميتال زي ما قلنا وبعد ما يعتمد الترانسيميتال دا - هيبدأ بقي المقاول بتسليم الاختبارات الخاصة بالمعدات و تجارب التشغيل للاستشارى من خلال ترانسيميتال طلب تسليم اختبار مبدأي وتشغيل للمنظومة TEST COMMISSION.
طيب بالمناسبة هو ايه الفرق بين الاختبار المبدأى للنظام والتشغيل للنظام الفرق بكل بساطة ان الاختبار للنظام معناه ان اشغل النظام وقت الريكويست ( طلب الفحص فقط ) بحيث اتاكد من تحقيق النقاط المطلوبه من النظام والتاكد من سلامة التركيبات وضمان ان النظام جاهز للتشغيل طيب ايه التشغيل - التشغيل بيبقي عمل تشغيل للنظام لفترة من الزمن قد تطول أو تقصر على حسب عقد المالك مع المقاول ولو فى الطبيعى بيتم التشغل للنظام لبعض الايام وليكن شهر بحيث نكون ضمنا التشغيل الامثل للنظام دون حدوث اى مشاكل ناتجه عن التركيبات او اصول الصناعة طيب الاستشاري خلال عمل التشغيل للنظام بيمر على النظام كله لفحص التركيبات بشكل نهائي بالاضافة لمراجعة موقف الملاحظات الموجوده فى طلبات فحص التركيبات والاختبارات طيب بعد ما المقاول يسلم اختبار مبدأي وتشغيل لكل الانظمة لكل الأقسام يبدأ يخطر المالك بانه عاوز يعمل محضر تسليم ابتدائي لكل الانظمه يعنى للمشروع كله ودا فرق الاستلام الابتدائي عن الاختبار والتشغيل وهو ان الاستلام الابتدائي بيكون للمشروع كله يعنى المقاول بيقول للمالك انا خلصت المشروع تعالى بقى انت والاستشاري لف براحتك وشغل اللى انت عاوزه واعملى ملاحظات نهائية للمشروع كله بحيث اخلصها واسلم المشروع تسليم نهائي طيب الملاحظات دي اسمها ايه – اسمها SNAG LIST طيب خلال المرحلة دى فيه بعض الحاجات المهمة اللى لازم المقاول يعتمدها من الاستشارى عشان يسلمها للمالك ومن اهم الحاجات دي اول حاجه اللوحات النهائية للمشروع اللى هيا الاسبيلت دراونج ولازم يتقدم للاعتماد - واللوحات دي بيبقى فيها الشغل النهائي بعد التعديلات اللى تمت نتيجة متطلبات الموقع يعنى مثلا فيه كمره خرسانه قدام المواسير فاضطر المقاول يغير مسارها فى اتجاه تانى او ينزل بمنسوبها وهكذا فبالتالى بيعمل بقى لوحات نهائية لكل الانظمة بعد التعديل وتسليم الاعمال وبيقدم اللوحات دى للاعتماد - طيب وايه تانى مطلوب يعتمده فى المرحلة دي - بيعتمد حاجه اسمها O AND M ودى معناها اوبيريشن اند مانوال يعني الكاتلوجات وكل المانوال وتعليمات التشغيل والصيانة الخاصة بكل مكون من مكونات الأنظمة بحيث يتم تقديمها للاستشاري واعتمادها - طيب بردوا لازم يكون فيه حصر كامل ونهائي للمشروع بحيث بردوا يتقدم ويعتمد من الاستشاري عشان يبقى المالك عنده حصر كامل بالكميات النهائية للمشروع عشان لو محتاج يجيب قطع احتياطىه للمشروع بتاعه يبقى عارف هيجيب ايه ونوعه ايه بالضبط بحيث الكميات يجيبها من الحصر والنوع يجيبه من جدول بيبقي المقاول عامله فى اللوحات النهائية بموديل القطعة بالاضافه لو عاوز تفاصيل اكتر بيجيب الداتا شيت من O&M اللى اتكلمنا عليها فاصبح المالك عنده كل ما يخص المشروع فى النهاية وطبعا بالنسبة للحصر ليه غرض تانى وهو المستخلصات بس دي هنشرحها باذن الله كمان شوية - طيب ايه تاني محتاجين نعتمده قبل التسليم النهائي كدا باقى حاجه واحده ولكن دي مش بتعتمد من الاستشاري ولكن بتتقدم للمالك مع المستندات اللى فاتت دى وهى شهادات الضمان الخاصة بموردين الانظمة فعلى حسب الانظمة اللى تم تركيبها ونوعها بيتم طلب شهادات الضمان للانظمة وان تم تركيبها طبقا لاصول الصناعه - طيب لاحد كدا المقاول عمل كل الى مطلوب منه بالاضافه طبعا انه خلص السناج ليست اللى قلنا عليها - كدا يقدر يسلم المشروع تسليم نهائي وساعتها على حسب بقي عقد المقاول ان عليه تسليم بعض القطع الاحتياطية اللى هيا الاسبير بارتس وبالتالى يسلمها للمالك طيب لما يقدم المقاول اخطار للمالك والاستشاري بانه خلص كل المطلوب وعاوز يسلم تسليم نهائي فبكدا الاستشاري والمالك بينزلوا يبصوا بصه نهائية لكل الانظمة ويشوفوا كل المستندات والقطع الاسبير اللى عاوزينها ولو لقوا كله تمام يستلموا تسليم نهائي من المشروع وينًزل المالك الناس بتوعه سواء طقم التشغيل او طقم الصيانه بحيث المقاول لو فى عقده التدريب ومعاه الموردين والمصنعين المعتمدين يدربوا الناس اللى تبع المالك على التشغيل والصيانة ويسيبوا معاهم تعليمات التشغيل والصيانة وبالتالى المقاول كدا انهى كل المطلوب منه فى المشروع وكدا المقاول بيبقي مهمته انتهت مشكورا.
والمالك ساعتها بيقول للاستشاري محتاج كل مستندات المشروع اللى تمت بين الاستشاري والمقاول والمالك بالاضافة انه بيحتاج الشهادات المطلوبه من المكتب الاستشاري الخاصة بان التركيبات والاختبارات والتشغيل فى المشروع تمت طبقا لاصول الصناعه وبطريقة فنية سليمة وطبقا للاكواد العالمية.
طيب بالنسبه للمقاول المالك بيحتاج ايه منه بيحتاج شهادة الضمان للانظمة من الموردين والمصنعين المعتمدين بالاضافه الى شهادة الضمان من المقاول لمدة معينه يتم وضعها فى العقد بتاع المقاول بحيث ان خلال المده دي المقاول بيبقي مسئول عن اى مشاكل ممكن تحصل خلال التشغيل بحيث يصلحها والمده دى غالبا فى معظم المشاريع بتكون سنه وممكن الشهاده الخاصة بضمان المقاول للاعمال ما تتقدمش طالما العقد بينهم مازال ساري والعقد موجود به شرط الضمان دا وبيتم ذكره كمان فى محضر التسليم النهائي للمشروع.
طيب كدا احنا الحمد لله شرحنا معظم المستندات اللى بتتقدم خلال المشروع من اول ما بننزل ارض المشروع لاحد ما المشروع خلص والمالك استلم والمقاول بيخرج من المشروع - طيب باقى بقى بعض المستندات البسيطة لازم اعرفهالك عشان انت تبقى فاهم كل الحكاية الخاصة بالمستندات.
اول حاجه ان خلال اى مرحلة من مراحل المشروع والمقاول لقى حاجه مش فاهمها بيبعت للاستشاري سؤال عنها ودا بيبقي خلال ترانسيميتال اسمه RFI - طيب تانى حاجه سابميتال اسمه اعتماد مستندات ودا بنقدم فيه اى مستندات مطلوب نعتمدها زي شهادات معايره شهادات اختبار نتائج اختبارات معينه من ثرد بارتي وهكذا - طيب فيه بقى بعض المستندات اللى الاستشاري بيقدمها للمقاول والمستندات دى اللى بيدى بيها تنبيهات للمقاول خلال اى مرحلة من مراحل المشروع بيعلق فيها عن حاجه اتركبت غلط او مش طبقا لاصول الصناعة او على حاجه تم تركيبها مخالفة وهكذا والمستند دا اسمة NCR - طيب لو فيه مثلا حاجه ذادت فى المشروع والمالك عاوز المقاول ينفذها ويديله فلوسها او فيه تعليمات معينه من المالك عاوز المقاول يتبعها فبيعمله حاجه اسمها تعليمات موقع أمر موقع يعنى SITE INSTRUCTION طيب اخر حاجه ودى ممكن تتقدم من المقاول اوالاستشارى او المالك كل منهم للاخر وهى الخطابات يعنى ممكن اى حد يخاطب اى حد من خلال الجوابات.
طيب لاحد هنا ونقدر نوضح نقطة مهمة وهى ان مستندات المشروع انا بقسمها لـ 3 اقسام وهى مستندات CONSTRUCTION تنفيذ ومستندات MONITORING او متابعة ومستندات مستخلصات فاول نوع دا الخاص بمستندات CONSTRUCTION ودا كل المستندات اللى اتكلمنا عليها فى الحكاية الللى فاتت كلها طيب تانى نوع هنتكلم عنه دلوقت باذن الله هو مستندات الخاصة بمتابعة او مراقبة المشروع يعنى ازاى المالك بيحاول يتابع المشروع ويراقب الاستشاري و المقاول من اول التركيبات لاحد التسليم النهائي ودا بيتم من بداية المشروع اصلا فبيتم تحديد موعد اسبوعي ثابت لعمل اجتماع بين المالك او نائب المالك والاستشاري والمقاول وقبل حدوث الاجتماع بيتم تجهيز اجندا للاجتماع بتنطرح لكل من المقاول والاستشاري والمالك بحيث ان الكل يبقي عارف هيجي الاجتماع فى الموعد المحدد دا يناقش ايه ويتكلم عن ايه وكل طرف يجهز مستنداته المطلوبه للنقاش والحل للمشاكل من وجهة نظره والبنود اللى فى الاجندا دى لازم تشتمل على بعض النقاط اللى بيها المالك بيقدر يحدد مسار المشروع بحيث يعرف هل هو ماشي فى مساره الصحيح ام لا طيب ايه النقط دى بقى اللى لازم تكون ضمن بنود الاجتماع الاسبوعى دا :
• تقديم جدول زمنى للمشروع واضح فيه كافة مراحل المشروع من اول الاعتمادات لاحد التسليم النهائي للمشروع موضح فيه تفصيلا مكونات كل نظام بمراحلة خلال التنفيذ وتاريخ كل بند بحيث يتم تقديمه بصفه دوريه بحيث نشوف احنا ماشين مع الجدول ولا لسه محتاجين نرحل حاجه لتاريخ اخر عشان لسه ماخلصتش.
• تقديم حجم الاعتمادات اللى تمت من الاستشاري وهل الاستشاري عنده اعتمادات متاخره ولا لا.
• تقديم تقرير اسبوعى مدعم بالصور يوضح ايه اللى اتنفذ خلال الاسبوع وموقفه ايه من التسليم للاستشاري.
• تقديم تقرير عن حجم العماله الموجوده بالموقع خلال الاسبوع وحاليا متواجد كام.
• تقديم تقرير عن المعوقات اللى بتقابل المقاول خلال التنفيذ.
• تقديم تقرير عن جميع المشاكل والاختلافات الفنيه الموجوده فى المشروع وطرق حلها.
• تقديم الموقف المالى من المستخلصات الخاصة بالمقاول والمشاكل الخاصة بيها.
وبالتالى دي النقاط الرئيسية اللى فى اى اجتماع اسبوعي بيتم النقاش فيها - طيب وغير كدا كمان بيبقي فيه تقرير يومي عن حجم العماله وايه اللى المقاول ناوى يعمله خلال اليوم واليوم اللى بعده يقول هو خلص ايه من اللى قال هيعمله امبارح وهكذا بيجي التقرير للمالك والاستشاري بحيث الاستشاري يراجعه يوميا ويقول المقاول فعلا نفذ الكلام دا ولا لا.
وبكدا المالك والاستشاري يقدروا يتابعوا المشروع خطوه خطوه ويقدروا يقيموا مسار المشروع وبناءا عليه يقدروا يحلوا المشاكل والمعوقات خلال التنفيذ اول باول عشان يقدر يستمر مسار المشروع فى مساره الصحيح وبالمعدل المطلوب.
طيب تالت نوع من المستندات زي ماقلنا وهى المستخلصات ودى بتبدأ من اول العقد اللى المقاول مضاه مع المالك بحيث لو فيه بند دفعه مقدمة بيتم دفعها وبعد كدا بيتم عمل مسخلصات جاريه على حسب نسب التنفيذ بحيث فى البداية بيتم الاتفاق بين المالك والاستشاري على النسب الجاريه بمعنى نسبة التوريد كذا ونسبة التركيب كمرحلة اولى كذا ومرحلة تانية كذا ومرحلة نهائية كذا وتشغيل واختبار مبدأي وتسليم ابتدائي كذا وتسليم نهائي كذا وبيبقي سايب فى النهاية نسبة على فترة ضمان الاعمال اللى اتكلمنا عليها من شويه بحيث لما يخلص فترة ضمان الاعمال بياخد النسبة الاخيره اللى باقياله وبالتالى نفهم من كدا ان بيتم تحديد كل النسب دى لكل بند من بنوود العقد ومقايسة المشروع وبعد تجهيز صيغة المستخلص دا طبقا للاتفاق اللى بيتم على النسب الجاريه – بيبدأ يشوف المقاول نسب التنفيذ اللى تم الانتهاء منها وتم تسليمها للاستشاري فبعد كدا بيعمل حصر لكل البنود بالكميات اللى اتنفذت ويقدمها للاعتماد من الاستشاري وبعد ما يتم اعتماد الحصر بيتم تقديم المستخلص الجارى وبيبقي مرفق له الحصر المعتمد من الاستشاري.
طيب لاحد هنا بقي ونقف ونبقي انهينا المحاضرة الخامسة عشان المعلومات ماتبقاش كتيره مره واحده عشان الناس تقدر تستوعب بسهولة باذن الله وكدا انهينا الحمد لله دورة حياة المشروع من ناحية المستندات بحيث نكون عرفنا تسلسل كل المستندات خلال مراحل المشروع ووظيفة كل مستند وامته بنقدمه.
وان شاء الله هنعرف المحاضره الجايه ان كان فى العمر بقيه الاقسام الموجوده فى المشروع وهنبدا نشرح أقسام ومكونات المبنى لبدء انشاء المبنى وبعد كدا بقي نبدأ نتعمق فى كل قسم من الناحية التصميمية والناحية التنفيذية باذن الله.
ليست هناك تعليقات:
إرسال تعليق