المحاضرة الثانية
أولا: الفيديو الخاص بالمحاضرة
ثانيا:الحديث الخاص بالمحاضرة
أتمنى المعلومات اللى فى المحاضرة الاولى تكون وصلت لكم بسهولة ان شاء الله ففى البداية احب اوضح نقطه مهمه للمهندس اللى لسه هيبدا فى المجال - ماتقلقش ان انت لسه جديد وانا خايف - خايف اغلط وانا لسه هقرا الاكواد كلها عشان افهم وانا ايه اللى درسته فى هندسه دا ملوش لازمه ولا ايه فاحب اقلك ما تخفش باذن الله مش هيبقي ناقصك كتير هيبقى ناقصك فقط التطبيق ودا هيبقى سهل باذن الله طالما شفت حاجه قريبه من التنفيذ والتصميم فى الكورس باذن الله فما تقلقش وادخل على المجال بقلب جامد واغلط واسال واتعلم وصلح وخليك عارف ان اللى مابيغلطش مابيتعلمش المهم ان يبقي عندك سعي وراء المعلومه وعندك حافز انك تعرفها وخليك فاهم ان اللى هيقرا كتير فى المجال دا هو اللى هيكون اقوي فيه باذن الله.
إن شاء الله تابع معايا واحدة واحده وخليك عارف ان مش لازم كل المعلومات تعرفها مره واحده انما ركز على الاساس فى كل حاجه وانت تدريجي هتعرف الباقي باذن الله مع مرور الوقت فى الكورس بالاضافه للحياه العملية.
ففى اول ما اتكلم القانون المصرى عن الموضوع دا اتكلم فى القانون 89 لعام 1998م وظهر تحت اسم قانون تنظيم المناقصات والمزايدات ودا ظهر عشان يبدا ينظم التعاقدات ويضع الشروط والاحكام والقوانين اللى تنظم العلاقه بينهم في حالة وجود اى مشاكل او خلافات وقعدنا شغالين بالقانون دا لاحد عام 2018 صدر قانون جديد رقم 182 وفى القانون دا فى الماده التالته ان تم الغاء القانون 89 لعام 1998 واصبح قانون 182 هو اللى بيتكلم عن الاحكام الخاصة بالمقاولات والاستشارات الهندسية وحتى غيروا اسم القانون وسموه قانون تنظيم التعاقدات ونزلو للقانون لايحه تنفيذية تبع وزارة المالية بقرار رقم 692 لعام 2019 وكان لازم ننوه على النقطه دى عشان ناكد ان فى القانون المصري مايحكم فى مجالنا يعنى الموضوع مش كما يتخيل البعض ان شغل المقاولات شغل خاص وبعيد عن الاحكام والقوانين بل بالعكس طالما مضيت عقد مسجل فى مجال المقاولات فلك حقوق وعليك واجبات وعند الاختلاف بيبقي فيه قانون خاص بمجالك يقدر يحكم.وبالنسبة للقوانين دى والفيديك للعلم بالشئ هوريهالكم - دا كدا القانون 89 اللى اتلغى وكان تحت اسم قانون تنظيم المناقصات والمزايدات زي ما نتم شايفين ودا بردوا قانون 182 اللى احنا ماشيين بيه لاحد دلوقت تحت اسم قانون تنظيم التعاقدات وبالنسبة للفيديك بردوا فيه منه كذا اصدار - اول اصدار كان فى 1999 م وتاني اصدار كان في 2005 وفيه كمان كتب مترجمه للفيديك زي دا وكمان فيه دراسه عن الفيديك بردوا اهيه للعلم بالشئ وبالمناسبه اى حاجه نوهت عنها او عرضتها عليكم هرفعلكم الملف بتاعها ان شاء الله قريب واحطلكم الرابط بتاعها فى فى وصف كل محاضره باذن الله.
المهم لاحد هنا كنا انهينا المحاضره الاولى وهنبدا بقي محاضرة انهارده باذن الله ببعض التفاصيل المهمه يعنى الكلام هيبقى بوضوح اكتر وبتفاصيل أكثر بس برضوا هنشرح واحده واحده باذن الله فركزوا معايا . هنبدأ بحاجه كنا نوهنا عنها فى المحاضرة الاولى اقلب السلايد وانزل بالهدف الهندسي وهو ان فيه حاجه اسمها منشأ هندسي ومنشأ غير هندسي وايه هو الغرض الهندسي اللى بيسعى لتحقيقة كل المنظومة فالهدف الهندسي دا هو نفس الهدف من الهندسه عموما فى اى مجال فلو نرجع بالذاكرة كدا لايام الكليه هنلاقى معني الهندسة عموما تادية المهمه بتحقيق 3 شروط وهي اعلى جوده و اقل وقت واقل تكلفه بس خلى بالكم هنا ان اول حاجه الجوده وبعد كدا الوقت والتكلفه يعنى ماينفعش اجي على الجوده عشان الوقت والتكلفه ولكن العكس صحيح ولكن فى النهايه لازم احاول انا كمهندس انى احقق التلاته مع بعض وبالتالى لما المنشأ يحقق الشروط الثلاثه فكدا دا منشأ هندسي وعشان كدا لما هنشرح كمان شويه حاجه اسمها العرض الفني والعرض المالى والدراسة الفنية والدراسه المالية والمناقصات وغيره هنلاقى ان الغرض منها نفس الهدف الهندسي يعني المالك بيشوف هيقدر يحقق الغرض بتاعه ولا لا فى اختيار المكتب الاستشاري والمكتب الاستشاري بيشوف هيقدر يحقق الغرض بتاعه ولا لا فى اختيار المقاول العام والمقاول العام بيشوف هيقدر يحقق الغرض بتاعه ولا لا فى اختيار المقاول الباطن وبالتالى المنظومه كلها بتشتغل بهدف واحدوهو الهدف الهندسي ود بيعود على المنشأ فنتيجه لكدا هيبقي المنشأ هندسي - طيب احنا كدا عرفنا يعني ايه منشا هندسي.
طيب لو جينا نلخص مراحل المشروع باختصار لازم انت كمهندس تبقي عارف مراحل المشروع وهي هتبدا من اول ما المالك يعمل دراسة جدوي للمشروع ودراسة بيئية وخلافه وبعد كدا بيحاول يحدد القيمة التقريبية للمشروع يعنى المشروع دا تقريبا هيكلف كام وبعد كدا بيمشي فى اتجاه انه ياخد الموافقات المطلوبه من الجهات المعنية اللى هي الجهات الحكومية عشان يبدا المشروع بالاضافة ان بعد عملية التصميم بيرجع ياخد الاعتماد الخاص بالمؤسسات الحكوميه الخاصة بالحماية والامان زي ادارة الدفاع المدني اوادارة الاطفاء والانقاذ في شغل مكافحة الحريق والانذار و LIFE SAFETY ومسالك الهروب وخطط الاخلاء وخلافه طيب وبعد كدا هنعمل ايه هنبدأ فى التعاقد مع الاستشاري من خلال الحكم على الدراسة المالية والفنية اللى بتتقدم بعد كدا بتبدأ مرحلة التصميم باقسامه المختلفة وبعد كدا بتيجي مرحلة التعاقد مع المقاول من خلال الحكم على العروض الفنيه والماليه اللى بيتقدموا خلال المناقصات وبعد كدا يحصل جلسة اللى هي بتاعة فتح المظاريف وغيره والمرحلة دى باختصار عشان مش مطلوب تعرف كتيير فى المرحلة دى اكتر من ان التعاقد بين المالك والمقاول يحتوي على خطاب الدعوه للمتناقصين (المقاولين اللى داخلين المناقصة) وبعد كدا تقديم العروض وبعد كدا خطاب القبول واتفاقية العقد والشروط والتعليمات الخاصة بالتعاقد.
طيب خلصنا بقي المرحلة دي ورسينا على المقاول اللى هينفذ بإذن الله تيجي بعد كدا مرحلة التنفيذ بتفاصيلها المختلفة اللى هنعرفها كمان شوية باذن الله طيب خلصنا مرحلة التنفيذ من تركيبات واختبارات للتركيبات وغيره من متطلبات التركيب نيجي بقي لمرحلة تجارب بدء التشغيل للانظمة وبعد التأكد من التشغيل الجيد للانظمه بانها تحقق الغرض منها على اكمل وجه فكدا نيجي بقى لمرحلة التسليم الابتدائي ودا بيبقي فيه تسليم الانظمه طبقا لشروط العقد في التسليم الابتدائي وخلال التسليم الابتدائي للمشروع بيتم عمل ملاحظات نهائية على التسليم الابتدائي ودي حاجه اسمها اسناج ليست بحيث لما يتم الانتهاء من هذه الملاحظات يتم عمل التسليم النهائي للمشروع وساعتها المالك بينزل الطاقم بتاعه الخاص بالتشغيل والصيانه وخلافه بعد ما يتم تدريبهم وإعطاء تعليمات التشغيل والصيانه لهم.
طيب كدا عرفنا مراحل المشروع باكتر من طريقة ودلوقت بقي عاوزين ندخل في المشروع نفسة و نعرف بالتفصيل الدنيا بتمشي ازاي عشان المقاول يبدأ يشتغل على ارض الواقع فهنبدا المره دي من الاستشاري لان المفروض من بداية المشروع هو اللى بيحاول يشتغل كحلقة وصل بين نائب المالك او المالك وبين المقاول لانه هو اللى بيقدم الدراسة الفنيه والماليه لنائب المالك أوالمالك يعنى الاستشاري بيقول للمالك انا هعمل تصميم كذا وكذا وكذا يعنى هستخدم مثلا فى التكييف نظام كذا وفى المكافحة الحريق نظام كذا وهكذا والتصميم دا بالنظام دا هيكلفك مصاريف كمكتب استشاري فى التصميم كذا وفى الاشراف كذا وبعد ما الاستشاري بياخد المشروع بيبدأ بقي يصمم المشروع ويخرج من عند الاستشاري حاجه اسمها الحزمه التصميمية ودي بتبقي عبارة عن 3 حاجات وهى B.O.Q ودي اختصار لـ BILL OF QUANTITY يعنى جداول الكميات او مقايسة المشروع وتاني حاجه المواصفات الفنية الخاصة بالمشروع وتالت حاجه وهيا اللوحات والرسومات التصميمية الخاصة بالمشروع وبالتالي كدا الاستشاري بدا يخلى المقاول يقدم بناءا على ال3 حاجات دول العرض الفني والمالى الخاص به عشان يتراجع ويتم اختيار المقاول المطلوب ويتم التعاقد معاه وهنا نقطه مهمه جدا لازم نوضحها وهى ان اللوحات التصميمية بتوصل للمقاول على اكتر من مرحلة.
اول مرحلة الاستشاري بيخًرج من عنده لوحات تصميمية فى شكل SCHEMATIC DESIGN يعنى بيعرض فيه التصميم بشكل مبدأي وبيبقي مرفق مع اللوحات توضيح للانظمه الموجوده فى التصميم وشرح كونسيبت او مفهوم التصميم بتاعها والمرفق دا اسمه اما ديزاين كونسيبت او بيزيس اف ديزاين ريبورت اللى هو (BODR) .
طيب تاني مرحلة بعد كدا بيبعت اللوحات التندر اللى هيا التندر دراونج ودي بتبقي اكتر تفصيل وبيبقي فيها تنسيق مع الاقسام التانية زي ماقلنا قبل كدا واللوحات دي ممكن تخرج على اكتر من ريفيجن يعنى اكتر من اصدار فى المجال بتاعنا لما نيجي نبعت اكتر من اصدار لنفس الحاجه بعد تعديل حاجه فيها بنقول ريفيجن 0 وبعدين ريفيجن 1 وهكذا لاحد ما نشوف اخر اصدار معتمد ايه ودا مش فى اللوحات فقط لا دا فى كل حاجه.
طيب نرجع لموضوعنا تاني وهو ان بعد ما الاستشاري بيبعت اللوحات التندر بيبعت بعد كدا حاجه اسمها DETAILED DESIGN والنسخه دي بقي بتبقي فيها التصميم بكل تفاصيلة مش ناقصة حاجه خالص سواء بقي تفاصيل التركيبات او تفاصيل المعدات ودا يعتبر نسخه نهائية وبعد مابيتم التاكد من التنسيق الكامل للنسخه دى مع جميع الاقسام والتاكد من ان المالك قال كل طلباته ومفيش تعديل بعد كدا ففى الحالة دى بيخرج من الاستشارى النسخه النهائية من اللوحات ودي بقي بتبقي اسمها IFC بمعنى ان طالما خرج نسخه IFC للتصميم يبقي كدا نقدر نقول التصميم اكتمل باذن الله.
طيب فى المرحلة دى المقاول بيبدأ يستلم نسخ التصميم المحدثه تباعا عشان يبدأ يفهم كل صغيره وكبيره فى المشروع ولو فيه حاجه واقف فيها بيقدم استفسار للاستشاري عنها والاستشارى بيرد عليه و بيوضحله الجزء اللى هو مش فاهمه فى التصميم وبناء على كدا بيكون خلاص المقاول سعر بنوده وعمل عرضه الفنى وعرضه المالى.
طب نلخص النقطة دي دلوقتى وهى ان المقاول بياخد ايه من الاستشاري - بكل بساطة الاستشاري بيدي للمقاول لوحات التصميم للمشروع ودي بيقى فيها المسارات الخاصة بقى بالمواسير وهكذا فكدا المقاول هيعرف هيمشي ازاى بالمواسير والانظمه الخاصه بالتصميم واماكن المعدات وبردوا هيعرف خصائص وسعات المعدات المطلوبة فى التصميم من خلال لوحة اسمها SCHADULE OF EQUIPEMNT وبالتالى المقاول كدا عرف مكونات النظام بتاعة وعرف كمان المعدات اللى عنده وكمان الاستشاري بيديله حاجه اسمها المواصفات الفنية بحيث بيقول فيها للمقاول المواصفات الخاصة بالخامات والتركيبات وتعليمات التشغيل والاختبارات وغيره.
طب هو ايه العرض الفني والمالى الخاص بالمقاول دا عبارة عن شرح آلية وطريقة التنفيد لكل بند من بنود المقايسة بمعني الاستشاري بيبعتله المقايسه فيها كميات تقريبية لكل بند قابل طبعا للزياده و النقصان على حسب متطلبات التنفيذ وبالتالى بناءا على الكميات التقريبية دي بيبدأ المقاول يشوف الكميات بتاعته فى كل بند ويبدأ يسعر المقايسه بتاعته طيب ناقصه ايه تاني عشان يقدر يسعر تسعير نهائي ناقصة يعرف ايه الشروط الفنية للبند دا سواء فى الخامة بتاعة البند او فى طريقة التنفيذ ودي بردوا الاستشارى بيديهاله تحت ما يسمى المواصفات الفنية للمشروع اللى قلنا عليها من شويه فبيقله فيها بقى المواصفات الفنية المطلوبة فى الخامات المستخدمة وفى طريقة التركيب والاختبار وبالتالى بعد إكتمال وصول ال3 حاجات دى اللى بنسميها الحزمة التصميمية أو DESIGN PACKAGE فبالتالى كل المعلومات كاملة موجوده عند المقاول فهيقدر ساعتها يحكم على المشروع بكل الجوانب فهيقدر ساعتها يبدأ يسعر كل البنود لانه عارف الخامة المطلوبه والشروط المطلوبه فيها وفي تركيبها وفى اختبارها وبالتالى هيبدأ يسعر البند وهنا نوقف لحظه عشان ندي فيها فكره مختصره عن التسعير لان التسعير عالم تانى لوحده فعشان اسعر البند لازم اشوف سعر شراء الخامة من المورد كام وبضيف عليه مصاريف النقل وتكاليف التركيب وتكاليف المعدات المستخدمه في التركيب والتجهيز للخامة وبعد كدا بضيف المصاريف الإدارية وتكاليف الاشراف الهندسي والفني وبعد كدا لو فيه نسبة هالك على الخامه بحط عليها نسبه وبعد كدا بحط نسبة الربح وبكدا اقدر احصل على سعر البند.
وخلى بالك ان التسعير دا من العوامل المؤثرة جدا فى المشروع وعليه عبء كبير جدا فى مكسب او خسارة المشروع لان التسعير بيكون مش سهل لان المقاول لو ذود الاسعار عن غيره فهيخسر المناقصة ولو قلل الاسعار جامد هو نفسه هيخسر ومش هيبقي فيه نسبة ربح مرضية وعشان كدا التسعير ده له اهميه كبيره بحيث ان المقاول لازم يوزن الاسعار بتاعته بحيث تنافس الاسعار بتاعة الاخرين وفى نفس الوقت تحققله الربح المطلوب وبالتالى المقايسة نفسها لازم نوزن اسعارها بحيث نكسب كويس فى البنود اللى تستاهل ونكسب مكسب بسيط فى البنود اللى ماتستاهلش ولازم بردوا المقاول ياخد فى اعتباره وهو بيسعر هل العقد اللى هيعمله مع الجهه المالكة هيبقي مقطوعية يعنى لامسم يعنى هناخد الشغلانه بكذا ولا هتيبقى REMEASURED وطبعا هيبقى الاصعب فى التسعير هيكون العقد المقطوعيه لان لو ذادت الكميه عن العقد مش هتاخد اى ذياده فى تمن العقد وبالتالي لازم تكون مامن نفسك في السعر الكلى وبردوا لازم المقاول ياخد فى اعتباره تغير السعر للعمله عشان فيه حاجات هتستورد من بره ولازم ياخد فى اعتباره بردوا مدة تنفيذ العقد لان طبعا كل ما الوقت بيزيد كل ما المصاريف على المشروع بتكتر وهكذا.
المهم اللى لازم تعرفة دلوقت ان المقاول بناءا على النقاط اللى قلناها دي بيحط التسعير بتاعه طيب نرجع لموضوعنا بقي المهم المقاول قدر يسعر وقام مقدم العرض المالى والعرض الفني بتاعة اللى بيقول فيه هينفذ ازاي من الناحية الفنية وبكام ودا عشان يتم اختيار المقاول المطلوب بحيث يتم التعاقد معاه زي ماقلنا قبل كدا ولما بيكون تم التعاقد بقي بالفعل وعرفنا المقاول اللى هينفذ المشروع.
نيجي بقى ننزل على ارض المشروع اللى هو الموقع وهو لسه ارض فاضيه دا لو انا مدنى او معمارى وممكن يبقي الموقع كدا دا لو انا كهروميكانيكال
طيب ومين بقي اللى المفروض هيبقى موجود في الموقع عشان المشروع يتنفذ ؟؟ طيب لاحد هنا بقي ونقف ونبقي انهينا المحاضرة التانية عشان المعلومات وماتبقاش كتيره مره واحده عشان الناس تقدر تستوعب يسهولة باذن الله.
وان شاء الله المحاضرة الجايه هنكمل فيها الحكايه بتاعتنا باذن الله ونعرف مين اللى هينزل المشروع والمفروض يعمل ايه بالضبط .
ليست هناك تعليقات:
إرسال تعليق