المحاضرة السادسة | مدخل للتعرف على مكونات المبني وكل أقسام المشروع
المحاضرة السادسة
أولا: الفيديو الخاص بالمحاضرة
ثانيا:الحديث الخاص بالمحاضرة
ما زلنا بنتكلم في مجال المقاولات والاستشارات الهندسية والحمد لله بعد الخمس محاضرات اللى فاتت المفروض تكون انت كمهندس فهمت المشروع بيبدأ إزاى لاحد ما بننزل على ارض الواقع وبعد كدا لما نزلنا الموقع عرفنا مين اللى هيبقى موجود فى الموقع من كل طرف وبعدين فهمنا المقاول والاستشاري بيفكروا ازاى وايه المستندات اللى بترتب الشغل بينهم طوال فترة حياة المشروع وعرفنا ازاى المالك والاستشاري بيراقبوا مسار المشروع وعرفنا مستندات المستخلصات وهكذا لاحد ما خلصنا شرح كل المستندات ولاحد هنا كدا نقدر نقول ان المهندس الجديد اول ما ينزل الموقع هيبقى باذن الله فاهم الدنيا ماشية ازاى ويقدر يتعامل في اى حاجه تخص المستندات.
طيب ان شاء الله هنبدأ بقي نعرف المفروض اى مبنى بيتكون من ايه ومين القسم المسئول عنه ونبدأ ندخل بقى فى الجانب التصميمي والجانب التنفيذي لكل مكون او كل قسم باذن الله بحيث اقلك على كل المعلومات اللى انا اقدر افيدك بيها باذن الله.
فدلوقتى هنشرح بطريقة عكسية يعنى المبنى الكامل المفروض بيبقي متكون من ايه بيبقى ببساطة
أول حاجه الشكل للمبنى ودا يختص بيه القسم المعمارى – ولما انا بقول شكل المبنى فمعنى كدا تحديد شكل المبنى من الخارج ودا يختص بيه قسم الـEXTERIOR DESIGN يعنى الشكل الخارجى ولو فيه مثلاLAND SCAPE فدا بردوا تبع القسم المعمارى
وايضا ضمن القسم المعماري الشكل الداخلى INTERIOR DESIGN بما فيه الفرش الداخلى الخاص بالمبنى يعني شكل الSPACES من جوه والفرش الداخلي اللى جواها.
طيب دلوقت كدا يبقي عرفنا ان اول مكون للمبنى وهو الشكل الخارجي والداخلى للمبني بما فيه الLANDSCAPE والفرش الداخلي ودا مسئول عنه القسم المعماري.
طيب بناءا بقى على الشكل المعماري اللى قلنا عليه دا فبيجي تاني مكون من مكونات المبنى وهو الاساسات الخاصة بالمبنى من اول بقى اختبارات التربة وتحديد الاساسات ولو فيه جزء (STEEL STRUCTURE) يعنى جزء معدنى فى المبنى وايضا الاسقف والاعمده والكمر والجدران وكل أعمال الخرسانات ولو فيه باردورات وطرق خاصة بالمبنى وهكذا فدا بيبقي اللى مسئول عنه القسم المدني (الانشائي).
لاحد هنا فجسم المبنى يبقي موجود يعنى اسقف وخرسانات وجدران وأبواب وخلافة وهنا يجي دور تالت مكون من مكونات المبنى وهو كل ما هو خلاف ذلك داخل المبنى يعنى لو دخلنا المبنى هنلاقى ايه هنلاقى اعمال الانارة واعمال التكييف واعمال مكافحة الحريق واعمال انذار الحريق وطبعا فى اقسام كتيره تانية كلها تندرج تحت قسم MEP هنشرحها بالتفصيل باذن الله كمان شوية.
طيب دلوقت كدا عرفنا مكونات المبنى بشكل عام ولكن عاوزين نعرف كل مكون مين مسئول عنه وكل قسم مسئولياته لاحد فين بالضبط فلو عندنا مشروع فهيبقي أرض فاضية فى الاول وبعد كدا بيبدأ يتقسم المشروع لـ 3 اقسام رئيسية وهما اول حاجه القسم المعماري ودا مسئول عن الشكل المعمارى والفرش الداخلى والجزء الخاص بحاجه اسمها FIRE SAFETY ومسالك الهروب واماكن سحب الدخان وخلافه فهنقف لجظة هنا فعندنا بالنسبة للحريق 3 حاجات وهما fire safety ,fire alarm and fire fighting فالfire safety دا اللى بيقي خاص بكل حاجه بتتعمل فى المبنى عشان نتجنب حدوث حريقة بالاضافة لتحنب الاضرار الناتجه عن حدوث حريقة فبيبقي مسئول عن تحديد نوع الماده اللى هتبقي مصنوع منها الابواب والجدران ومخارج الهروب وايه الاماكن اللى هتتحدد لمسالك الهروب وعدد المخارج دي وهكذا واما ال fire alarm د ا انذار الحريق ودا بيستخدم لمراقبة كل المبنى بحيث يدى انذار فى حالة حدوث حريق ودا مسئول عنه قسم الكهرباء اما fire fighting فدا انظمة مكافحة الحريق نفسها يعنى الانظمه اللى بحاول اطفى او اخمد بيها الحريق لاحد الدفاع المدنى مايجي يطفى ودا اللى مسئول عنه قسم الميكانيكا وطبعا كل دا هنشرحه بالتفصيل باذن الله المهم ان عاوزك دلوقت تعرف ان قسم المعماري بيبقي مسئولياته مشتملة على الشكل الخارجى وlandscape والشكل الداخلى والفرش بالاضافة لـ fire safety.
تانى قسم عندنا هيبقي القسم المدني او الانشائي ودا بيبقي مسئول عن الاساسات وكل الخرسانات والحوائط المكونه للمبني وطبعا الsteel structure ولو فيه طرق او باردورات خاصة بالمشروع بالاضافة انه بيدخل مع المعماري فى المسئولية الخاصة بالLIFE SAFETY و FIRE SAFETY PLAN .
طيب تالت حاجه بقى القسم الكهروميكانيكال ودا بقى القسم بتاعنا اللى هنبدأ نشرحه بالتفصيل لانه فيه بقي أقسام كتيره جدا هنعرفها دلوقت باذن الله زي التكييف المركزي واعمال الplumbing واعمال الكهرباء من اناره وغيره واعمال مكافحة الحريق وغيره فاقسامه كتيره هنعرفها بالترتيب باذن الله دلوقت.
اذن لاحد هنا لازم تبقي عارف ان اى مبني بيبقى مكون من 3 اقسام رئيسية وهما معمارى ومدني وكهروميكانيكيال.
طيب ترتيب الشرح هيبقي ازاى عشان ماتهش مني - هنعرف الاول يعنى ايه ميب و هنشرح مكونات الاقسام الكهروميكانيكال بالتفصيل باذن الله بحيث تاخد فكره عامة عن كل الاقسام وتعرف مين بيعمل ايه وبعدين ندخل فى شرح بعض المعلومات المدنية والمعمارية اللى لازم احنا كقسم MEP نكون عارفينها وواعيين لها جدا طيب ممكن حد يسأل ويقول وانا كمهندس ميكانيكا او كهرباء مالى ومال مدني ومعماري هقلك ان انت كمهندس ميكانيكا او كهربا لازم تعرف بعض المعلومات المهمة جدا من قسم مدني ومعمارى عشان شغلك هيتداخل معاها فلازم تبقي عارف المعلومات دي ضرورى جدا فهنشرح باذن الله كل ما هو مطلوب تعرفة من القسم المدني والمعمارى وبعد ما نخلص المعلومات دى ندخل بقي فى شرح القسم بتاعنا جزء جزء بالتفصيل باذن الله.
طيب هنبدأ بقي فى اول حاجه وهي ايه بقى معنى ميب وايه الاقسام المكونه للكهروميكانيكال فكلمة ميب عبارة عن اختصار ل3 اقسام رئيسية وهى اول حاجه M يعنى MECHANICAL اى الاعمال الميكانيكية تانى حاجه E يعنى ELECTRICAL اى الاعمال الكهربية و P يعنى PLUMBING يعنى اعمال السباكة وخلافة يعنى اعمال تغذية مياه واعمال الصرف وحمامات السباحة والنوافير والرى ومعالجة المياه وخلافة.
طيب كل قسم بقى بيندرج تحته اقسام ايه اولا ميكانيكا بيندرج تحته اعمال ال HVAC يعنى HEATING VENTILATION AND AIR CONDITIONNING القسم دا اللى بيختص باعمال التكييف المركزي بمكوناته وانظمته المختلفة او حتى انظمة التكييف العادية يعنى كل الانظمة الخاصة بالتكييف والتهوية وأنظمة سحب الدخان.
تاني حاجه اعمال مكافحة الحريق ودا القسم اللي بيختص بعمل الانظمة اللى بتطفى الحريق على اختلاف انظمته فهيبقي مسئول عن حماية كل ماهو داخل المبني سواء فرش او معدات او اشخاص وغيره.واحيانا القسم دا بيندرج تحت تقسيمة الplumbing وبيبقي طبعا تقسيمة الأقسام في الموقع مهندسين تكييف ومهندسين مكافحة حريق وصحي لكن كلاهما ميكانيكا المهم هنا ان قسم مكافحة الحريق بيندرج تحت قسم ميكانيكا.
تالت حاجه انظمة الوقود والمولدات ودا اللى بيختص باعمال مولدات الطوارىء اللى بتولد الكهرباء ساعة الكهرباء الرئيسية ما بتقطع عن طريق امدادها بالوقود من خلال منظومة وقود كاملة وعشان طبعا المولدات دى فيها تركيبات كهرباء وميكانيكا فدا بيبقي مشترك بين قسم كهرباء وميكانيكا كل قسم بيبقي مختص بالجزء بتاعة.
رابع حاجه قسم الغازات الطبية والهواء المضغوط ودا بيظهر فى الكليات الطبية والمستشفيات و النظام دا زي نظام الاكسجين والنيتروجين وثاني اكسيد الكربون وايضا نظام الهواء المضغوط و بيبقي عباره عن خطوط وشبكات مواسير بتنقل الغازات الطبيه والهواء المضغوط لجميع الغرف وجميع المعدات وجميع التطبيقات الطبيه المطلوبة.
طيب بالنسبة لقسم الكهرباء فاول نظام بيندرج تحته هو الاضاءة وطبعا الاضاءة معروف معناه ايه فهو نظام بيشتمل علي كل المكونات اللازمة لاضاءة المبني من اول بقي الكابلات والمواسير اللي بيمشي فيها الكابلات والتريهات ومفاتيح الانارة وغيره من الانظمة اللي لسه هنعرف فكره مختصره عنها باذن الله.
وتاني حاجه انظمة الباور يعني النظام اللي بيدي مصدر كهربا علي عكس الاناره فدي بتاخد كهربا يعني بتستهلك كهربا انما نظام الباور دا النظام اللي بيخرج كهربا بمكوناته المختلفه من المواسير والكابلات وسوكيت ومفاتيح الفصل اللي بتبقي معموله للصيانه وخلافه وطبعا فيه باقي المكونات الاخري الbulk زي انظمة نقل القدره من اول محطة التوليد ومرورا بمحطة النقل والتوزيع ووصولا للمبني يعنى ممكن نقسم انظمة القدرة الكهربية لانظمة الجهد العالى والجهد المتوسط والجهد المنخفض بمكوناتهم المختلفة ودا طبعا على حسب المشروع عبارة عن مبنى عادى ولا محطة توزيع ولا محطة توليد وهكذا.
تالت حاجه انظمة الارضي اللى هو الEARTHING فنظام الارضي دا بقي النظام اللي بيتعمل للانظمة الكهربية لتامين المعدات والناس الموجودين داخل المكان من خطر اي ماس كهربي او تفريغ كهربي او غيره بحيث انه يتم عمل شبكة لتوصيل المنظومات الكهربيه مع الارض.
طيب رابع حاجه نظام موانع الصواعق بالمبني ودا ببساطه بيبقي عباره موانع الصواعق اللي بتركب علي المبني للحمايه من التيار الكهربي الكبير اللي بيتولد نتيجة الصواعق.
خامس حاجه نظام الاسكادا ودي معناها SUPERVISORY CONTROL AND DATA ACQUISITION ودا نظام مراقبه وتحكم في نفس الوقت لكل المنظومات داخل المبني وبيظهر النظام دايما في المنشئات اللي بنحتاج فيها معدات وتحكم اكثر زي محطات الطاقه والمصانع والمنشئات الصناعيه اللي بتحتاج تحكم كبير في المعدات وغيره والمعدات والقدارت الخاصه بنظام الاسكادا بيبقي كبير وقدراته عاليه بحيث تستوعب كل المطلوب منها في المراقبه والتحكم للمعدات في المنشئات الصناعيه ومحطات DCP.
وسادس حاجه انظمة الUPS ودي معناها UNINTERRUPTIBLE POWER SUPPLY ودي وظيفتها انها بتتربط على الانظمة اللى انا مش عاوزها تفصل ابدا حتى لو الكهربا قطعت فبيمنع انقطاع الكهرباء عن الانظمه والمعدات الحساسه المطلوب عدم انقطاع الكهرباء عنها زي مثلا انظمة حفظ المعلومات وتخزين البيانات زي الداتا سنتر وغيره فالحاجات دي لازم تكون متوصله بصفه دائمه بالكهرباء دون انقطاع ولو لحظه لان دا هيؤدي لفقد البيانات ودا مينفعش وبالتالي في الحاله دي بنحتاج للنظام دا.
سابع حاجه انظمة توليد الكهرباء بالخلايا الشمسية ودي الانظمة اللي بتستخدم الخلايا الشمسيه في توليد تيار كهربي بحيث ان النظام دا بيبقي عباره عن خلايا شمسيه بتمتص اشعة الشمس وتستغلها في توليد كهربا وتخزينها في بطاريات بحيث يتم استغلالها مثلا في الاضاءه وخلافه والنظام دا بيستخدم في 3 حالات وهي انه بيعمله كنظام احتياطي يضي في حالة انقطاع الكهرباء او كنظام لتوفير الطاقه بحيث انها تستخدم بالليل في الوقت اللي مش فيه ضوء الشمس او يستخدم كنظام اضاءه اساسي في الاماكن الصحراويه اللي لا يوجد انظمة نقل كهرباء تصل ليها.
اما ثامن نظام وهو نظام مولدات الطوارئ ودي المولدات اللي بتستخدم الوقود في توليد الكهرباء في حالة انقطاع الكهربا الاساسيه ودى اللى لسه متكلمين عنها من شوية وقلنا انها مشتركة بين قسم ميكانيكا وكهربا.
واخر قسم فيه وهو انظمة LIGHT OR LOW CURRENT ودي بقي متشعبه شويه وهي عباره عن كل الانظمة اللي بتحتاج تيار خفيف يعني تيار قيمته قليله وبتبقي عباره عن فقط power قيمتها صغيره او مجرد signal يعني الخلاصه كل الانظمة دي بتحتاج تيار قيمته قليله غالبا بيحتاج مثلا قيم بالمللي امبير وجهد 24 فولت فمش زي المواتير والمعدات الكبيره اللي بتسحب تيار مثلا 100 امبير واكتر من كدا وبتحتاج جهد عالي وهكذا ولذلك كل الانظمة دي اتجمعت مع بعضها تحت مايسمي بانظمة التيار الخفيف والانظمة دى زى انظمة انذار الحريق وانظمة الداتا والتيليفون وغيره من الانظمة اللى هنعرفها دلوقت باذن الله.
طيب بالنسبة لأعمال السباكة فدي عبارة عن انظمة تغذية مياه الشرب وانظمة الصرف وانظمة الري وانظمة حمامات السباحة وانظمة النوافير وانظمة سخانات المياه اللى بتستخدم الخلايا الشمسية فى التسخين وأنظمة المعالجة المختلفة للمياه وإعادة استخدامها مره اخري زي مثلا في WATER CLOSET الخاصة بالحمامات وطبعا انظمة GRAY AND BLACK WATER وطرق استغلالها سواء في الري او بعض التطبيقات المختلفة او غيره بعد طبعا التأكد من صلاحيتها او اجراء بعض عملبات المعالجة لها وطبعا هنعرف كل الانظمة دى باذن الله بالتفصيل .
لاحد هنا المحاضرة السادسة تكون خلصت وان شاء الله المحاضرة القادمة هنتكلم ببعض التفاصيل اكتر عن كل قسم وبعدين نقول بعض المعلومات اللى تهمنا فى قسم المعمارى والمدنى كمهندسين MEP.
ليست هناك تعليقات:
إرسال تعليق