المحاضرة التاسعة | أنظمة التيار الخفيف من إنذار حريق وغيره والأنظمة الصحية من تغذية وصرف وغيره
المحاضرة التاسعة
أولا: الفيديو الخاص بالمحاضرة
ثانيا:الحديث الخاص بالمحاضرة
السلام عليكم ورحمة الله وبركاته
أهلا وسهلا بيكم فى قناة [MEP SCHOOL]
ميب سكول
#MEP_SCHOOL
#ميب_سكول
#المقاولات_والاستشارات_الهندسية
ما زلنا بنتكلم في مجال المقاولات والاستشارات الهندسية وكنا فى المحاضرة اللى فاتت اتكلمنا عن كل قسم ببعض التفاصيل لاحد مانتكلم بالتفصيل من الناحية التصميمية والناحية التنفيذية باذن الله وكنا وصلنا في شرح الأنظمة لاحد أنظمة الlow current اللى هي أنظمة التيار الخفيف وان شاء الله نكمل الأنظمة دى في محاضرة انهاردة.
تاسع حاجه انظمة التيار الخفيف اللي حكينا عنه من شويه ومعظم الأنظمة دى كلنا بنشوفها في حياتنا الطبيعيه فمش هتحتاج كلام كتير لتوضيحها بشكل عام
فأول نظام في الأنظمة دي هي انظمة انذار الحريق اللى هي بتراقب كل الاماكن داخل المبنى بحساسات SENSORS بحيث عند حدوث اى حريق فى اى مكان فالحساسات بتدى إشارة الى لوحة التحكم الخاصة بنظام انذار الحريق وبالتالي اللوحة تشغل نظام انذار الحريق وبالتالي مكوناته ببساطة هي CONTROL PANEL , DETECTORS , ALARM OUTPUTS.
تانى حاجه بقي هي انظمة الداتا اللى بيتم بيها عمل شبكات اتصال داخليه بين الاجهزه
وثالث حاجه انظمة التليفون ودي طبعا كلنا عارفينها بانواع التليفونات بقي المختلفة وطبعا مخارج التليفون بالإضافة بقي للوحات الخاصة بشبكة التليفونات الخاصة بيهم فلو مثلا عندنا مبنى فيه مكاتب وكل مكتب عليه تليفونا فبيتم عمل شبكة مركزيه لعمل وسائل اتصال داخليه بين كل افراد المبنى وان شاء الله هنعرف التفاصيل للنظام دا لما يجي دوره.
ورابع حاجه انظمة الصوت من مايكريفون وسماعات ووسائل التوصيل بينهم وهكذا والنظام دا معظمنا عارفينه بشكل عام ودا اللى احنا محتاجينه دلوقت.
وخامس حاجه انظمة ال TVوالشاشات والنظام دا بردوا معروف اللى هو نظام التليفزيونات وأنظمة شبكات الدش وهكذا.
وسادس حاجه نظام الBMS ايضا للمراقبه والتحكم ويعتبر النظام دا نموذج مصغر من نظام الاسكادا او بقدرات و مواصفات فنية اقل شويه ولذلك بيفرق عن نظام الاسكادا في ان الاسكادا بتستخدم اكتر فى الاعمال الميكانيكية والتطبيقات الصناعية اللى بتحتاج قدرات ومواصفات فنية كبيره.
بعد كدا فيه نظام ACCESS CONTROL اللى هو خاص بغلق الابواب وان مش اى حد يفتحها الا اللى معاه كارت خاص او بالبصمة وهكذا او نظام تحكم اوتوماتيك لفتح وغلق الأبواب.
وبعد كدا فيه نظام NURSE CALL الموجود فى المستشفيات بحيث يبقي فيه نظام يطلب المريض بيه الممرض او الممرضه عند الاحتياج لها.
بعد كدا فيه انظمة الكاميرات والتامين SECURITY SYSTEM ودى بتبقي عباره عن أنظمة الكاميرات بجهاز DVR OR NVR اللى بيتم التسجيل عليه بالإضافة طبعا لوسائل التوصيل بينهم والكاميرات دى لها أنواع متعدده باذن الله هنتطرق لها ونشرحها بالتفصيل باذن الله.
وبعد كدا فيه نظام INTERCOM اللى بيوفر طريقه للاتصال بين اللى بيدخل مكان مع الناس اللى داخل المكان ودا بيبقي عباره عن جهاز استقبال او اتصال خارجي وجهاز داخلى وكابلات اللى بتربط الجهازين ببعض بالاضافه ان ممكن النظام دا يكون متوصل مع نظام كاميرات للتامين الأكثر.
واخيرا نظام QUEUE اللى هو النظام الالكتروني اللى بيبقي فى البنوك مثلا لترتيب الدور للزوار بحيث يبقي فيه ترتيب بين الافراد لتنظيم اداء الخدمه لهم ودي بردوا بنشوفها كلنا لما اى حد بيدخل بنك بيلاقى كابينه كدا بيقطع منها رقم على حسب هو عاوز ايه بالضبط وبالتالي بياخد ترتيب معين عشان يروح للى بيأديله الخدمه وبعد كدا النظام بينادى على رقمه لما بيجي دوره وهكذا وبكدا يبقي خلصنا قسم الكهرباء.
ونيجي بقي لثالث قسم رئيسي واخر قسم وهو قسم الPLUMBING والقسم دا انا بسميه القسم صاحب المعلومات المدفونة لانه بيحتوى على معلومات كتيره جدا لكن مش متداوله في السوق بنفس القدر اللى موجود في مكافحة الحريق والتكييف بالرغم انه فيه فنيات كتييره بردوا ولكن ممكن نقول ان دا راجع انه الاعمال اللى ببتنفذ في معظم المشاريع فيما تخص PLUMBING معظمها أنظمة تقليدية مفيهاش الفنيات الكتيره والمشاكل المعقده اللى تخلينا نبحث اكتر وندور اكتر فمش هنلاقى فنيات كتيير الا فى المشاريع الكبيره جدا اللى بتحاول مثلا تاخد شهادات الLEED وهكذا.
المهم نرجع لموضوعنا – نظام PLUMBING - بيحتوي على ::
أول حاجه انظمة تغذية المياه اللى هيا WATER SUPPLY SYSTEMS ودا النظام اللى بيغذي المبنى بالمياه من خلال المضخات الخاصة بيها وبالتالى النظام ببساطة بيبقي عباره عن غرفة مضخات ومواسير ومحابس تحكم وبالتالى بيتم التوصيل من خلال مياه البلدية لاحد اخر مكان للمبنى وطبعا بيبقي النظام دا شامل للمياه الساخنه والبارده سواء بقي من خلال عمل سخانات مفرده لكل مكان او عمل سخانات مركزية وطبعا لوالمياه دى هتستخدم فى اغراض الشرب فلازم يتم التاكد من صلاحية المياه لاغراض الشرب وطبعا لو مش صالحة بيتم عمل منظومة معالجة للمياه وهكذا وطبعا النظام دا بشتمل ايضا على الاجهزة الصحية اللى بتستخدم فى الحمامات سواء بقى احواض او URINAL أو W.C وجميع الاجهزة الصحية والنظام دا مش شرط بيبقى جوا المبني فقط ولكن بيشتمل ايضا على كل الأنظمة والمكونات الخاصة بنقل وتوزيع مياه البلدية من اول مصدرها الرئيسي وحتى استخدامها في الأجهزة الصحية داخل المبنى.
ثاني حاجه بقي انظمة الصرف بانواعها المختلفة من ONE PIPE SYSTEM و TWO PIPE SYSTEM والمكونات الخاصة بنظام الصرف بدءا بقى من الاجهزة الصحية والFLOOR DRAINS وال FUNNEL FLOOR DRAINS و trench drains و roof drain وغيره من الاكسسوارات الصحية ومرورا بقى بمواسير الصرف والتهويه soil pipe و waste pipe و vent pipe وأيضا gully traps و oil trap او grease interceptor و slow down chamber ووصولا الى غرف التفتيش inspection chamber او لو فيه sumpit وانتهاء بالمناهيل manholes فكل الانظمة دى داخل مسئولية مهندس الميكانيكا قسم الصحى plumbing .
ثالث حاجة انظمة الرى بانواعها الكتيره والمتطوره بشكل ملحوظ جدا ومنظومة الرى دى بتختلف على حسب الافكار والتطبيقات والسعات والمساحات المطلوبه والتكلفة يعنى الرى لlandscape غير الرى اللي بيتم لاراضي زراعيه على مساحات كبيرة مثلا ولكن غالبا فى معظم المشاريع فى مجالنا بيكون الرى للlandscape ولكن بردوا الري للاراضي الزراعيه دا ضمن مهام مهندس الميكانيكا وهنتطرق لشرحة بردوا باذن الله بالتفصيل ونظام الري دا له انواع مختلفة زي انظمة الرى السطحي Surface Irrigation وانظمة الرى المضغوط Pressurized Irrigation ونظام الPressurized Irrigation دا بيتنوع لانظمة متعدده Sprinkler Irrigation SIS و Micro-Irrigation MIS
وتحت كل نوع انظمة اخرى زى نظام الرشاشات مثلا فى منه انواع زى رشاشات ثابته ورشاشات متحركة ونظام ال Micro-Irrigation فيه منه انواع بردوا زي الDRIPPERs, SPRAYERs , FOGGERs, MICRO-SPRINKLERS وغيره من الانظمة اللى هنعرفها باذن الله بالتفصيل لان لو شرحنا بس انواع أنظمة الرى دلوقت هناخد محاضرات كتيره لان انظمته متنوعه جدا وبتتطور بسرعه مع الوقت وكمان النظام دا بيوسع شويه لو هيحصل عمليه معالجه لمياه الصرف المعاد استخدامها بعد معالجتها وبالتالى بيزيد عليه منظومة معالجه لمياه الصرف وبعد كدا بيبقي باقى نظام الرى عادي المهم ان انت لازم تعرف بس دلوقت ان النظام دا عباره عن ري للمزروعات وبتشتمل مكوناته علي غرفة مضخات ومواسير ومحابس تحكم وhoses والمخارج للمياه زي الرشاشات فى حالة نظام الرى بالرشاشات وغيره من المكونات ودا مسئول عنه مهندس الميكانيكا الصحي.
رابع حاجه أنظمة حمامات السباحه وحمامات السباحه لها انواع مختلفه فيه نوع skimmer swimming pool وفى نوع over flow swimming pool وفيه نوع pipe less swimming pool وفيه نوع plastic swimming pool وغيره ولكن دول الانواع الاساسية وفيه تقسيمه تانيه وهي indoor swimming pool و outdoor swimming pool وهكذا وطبعا كل نوع له نظامه يعنى لو skimmer فبيبقي منسوب المياه داخل احمام اقل من حرف الحمام ولو overflow فبيبقى منسوب المياه اعلى بحيث يحصل overflow ويتم تصريفها من الgrill اما نوع ال pipe less فدا بيبقي المكنه بتاعتها يعنى المضخات ووحدات الفلترة بتبقي غاطسة جوا حمام السباحه. والمنظومة الخاصة بحمام السباحه بتبدا الاول بحوض حمام السباحه بما فيه بقى من الاكسسوارات الخاصة بيه من drains و filling inlets و skimmers و grills وغيره من الاكسسوارات وبعد كدا فيه بقي منظومة المواسير والمحابس وغرفة المضخات ووحدات الفلترة والمعالجة بالـdosing system وغيره من المكونات. المهم ان انت تبقي عارف ان مهندس ميكانيكا الخاص بالاعمال الصحية بيبقي مسئول عن حمامات السباحه.
خامس حاجه النوافير على اختلاف أنواعها ودي بتفرق من نوع لاخر عن طريق الشكل المطلوب بحيث نجيب نوزل يحقق الشكل دا وتصميم وتنفيذ النوافير يشبه بقدر كبير تصميم حمامات السباحه اللى هيا من النوع skimmer وبردوا بتتكون من drains و filling inlets و skimmersو nozzles وغيره من مواسير وغرفة مضخات ووحدات الفلتره وغيره من المكونات. والانظمة دي بردوا مهندس الصحي بيبقي مسئول عنه.
سادس حاجه انظمة السخانات الشمسية اللى بتستخدم الطاقة الشمسية فى تسخين المياه ووالنظام دا له انواع مختلفة فى تصميمها ففى مثلا نظام السخانات من النوع الانابيب الفارغة ( (vacuum pipes collector وفيه نوع تانى عبارة عن انابيب حرارية (heat pipe collector) وفيه نوع تالت عبارة عن خلايا مسطحه (flat collector) وطبعا كل نوع له مزايا وعيوب والانظمة دي بتتكون من المجمعات الشمسيه ايا كان نوعها ومن خزان معزول وملف تسخين كهربائي احتياطى بيشتغل اوتوماتيك عن طريق حساس لدرجة الحرارة ودا بيشتغل فى حالة عدم وجود درجات حرارة عالية فى فصل الشتاء مثلا وبردوا من ضمن مكونات النظام دايرة الجليكول اللى بيستخدم لمنع تجمد السائل فى حالة الاماكن اللى فيها درجات حرارة قليلة جدا تودي الى التجمد وباقي النظام بقي نظام مياه تغذية عادى خطوط مياه بارده وساخنه وهكذا وطبعا دا بردوا بيوفر في الطاقه وبردوا دا من الحاجات اللى بتدى نقط كتيره للحصول على شهادة LEED المهم ان النظام دا من الانظمة اللى تخص مهندس الصحي.
سابع حاجه أنظمة المعالجة المختلفة للمياه ودي انظمة مختلفة ومتشعبه على حسب طريقة المعالجة سواء بقي فى المواد المستخدمة ونسبها وخطوات المعالجة نفسها لاى نوع من المياه وطبقا لاي استخدام مطلوب من المياه وبالتالى بيتم تحديد وتصميم المنظومة المطلوبه للمعالجة والفلترة وبعد كدا يتم استخدام المياه مره اخري وامثله على الانظمة دي زي مثلا معالجة مياه الصرف الخفيف WASTE DRAIN او صرف المطر واعادة استخدامها في WATER CLOSET الخاصة بالحمامات أو فى الرى وغيره من التطبيقات الاخرى ولما نيجي نشرح المنظومات دى باذن الله ان كان فى العمر بقية فدا هيودينا للـ GRAY AND BLACK WATER و هنعرف ساعتها ايه معني gray وال black والمصادر بتاعتهم والشبكات الخاصة بيهم.
طيب لاحد هنا بقي يعتبر اخدنا فكره كويسه جدا عن تقسيمات الاقسام الخاصة بالاعمال الكهروميكانيكية واخدنا فكره عن كل مكونات المبنى او المشروع بيعمل ايه لاحد ما سيتم التعمق فيهم باذن الله ان كان فى العمر بقية.
وبكدا نبقى انهينا المحاضرة التاسعة الحمد لله وان شاء الله المحاضره القادمة نبدأ بقي ندخل في الأقسام بتاعتنا بالتفصيل قسم قسم من الناحية التصميمية والتنفيذية باذن الله.
وفى النهاية الحمد لله على ماقد كان وما هو كائن وما سيكون
دمتم فى رعاية الله وأمنه
والسلام عليكم ورحمة الله وبركاته
ليست هناك تعليقات:
إرسال تعليق