المحاضرة الثامنة | أنظمة الغازات الطبية والإضاءة والقدرة والإسكادا والطاقة الشمسية وغيرة بالمبني
المحاضرة الثامنة
أولا: الفيديو الخاص بالمحاضرة
ثانيا:الحديث الخاص بالمحاضرة
السلام عليكم ورحمة الله وبركاته
أهلا وسهلا بيكم فى قناة [MEP SCHOOL]
ميب سكول
#MEP_SCHOOL
#ميب_سكول
#المقاولات_والاستشارات_الهندسية
ما زلنا بنتكلم في مجال المقاولات والاستشارات الهندسية وكنا فى المحاضرة اللى فاتت بدأنا نتكلم عن كل قسم ببعض التفاصيل لاحد مانتكلم بالتفصيل من الناحية التصميمية والناحية التنفيذية باذن الله وان شاء الله انهارده هنكمل شرح الأنظمة دى.
رابع حاجه وهى أنظمة الغازات الطبيه والهواء المضغوط (MGPS) ودي بتظهر فى الكليات الطبية والمستشفيات و النظام دا زي نظام الاكسجين والهواء المضغوط ونظام الvacuum وهكذا فلو هنقول بعض النقاط المختصره عن الأنظمة دى فهى باختصار عباره عن نظام الاكسجين اللى بيستخدم فى علاج الجهاز التنفسي من قبل دكاترة الصدر وبيستخدم بردوا فى عمليات التخدير والنيتروجين اللى بيستخدم فى تشغيل المعدات الجراحية وثاني اكسيد الكربون اللى بيستخدم فى اعمال فى الافاقه من التخدير والتجميد العينات وبردوا فيه الايثلين اللى بيستخدم فى التخدير وايضا نظام الهواء المضغوط والهواء المضغوط دا بيستخدم فى نوعين من الانظمة وهى نظام الهواء الطبي اللى بيستخدم فى اجهزة التهوية بالاضافة الى استخدامه كغاز ناقل للمواد الطبيه اللى بيتم امدادها اما النظام التانى وهو نظام الهواء الجراحى ودا بيستخدم فى تشغيل المعدات الجراحية وبردوا بيستخدم كمصدر لادارة وتشغيل الاجهزة الطبية اللى بتشتغل نيوماتيك PNEUMATIC زي كراسي اطباء الاسنان وطبعا فيه غازات تانية زي اكسيد النيتروز اللى بيستخدم فى عمليات التخدير وخليط اكسيد النيتروز مع الاكسجين اللى بيستخدم كمخفف للالم وخليط الهيليوم والاكسجين اللى بيستخدم فى علاج الجهاز التنفسي وحالات ضيق التنفس وانسداد المجارى الهوائية و بردوا من ضمن الانظمة الخاصة بالغازات الطبية هى انظمة السحب والتفريغ اللى هيا انظمة الVACUUM سواء بقى الانظمة المركزيه او النظام الPORTABLE ودي بتستخدم فى سحب السوائل ومخلفات العمليات ومخلفات نظافة المعدات وغيره والانظمة الخاصة بالغازات الطبية بتبقي عباره عن خطوط وشبكات مواسير غالبا من النحاس بتنقل الغازات الطبيه والهواء المضغوط لجميع الغرف وجميع المعدات وجميع التطبيقات الطبيه المطلوب تغذيها وبتكون المواسير دى عليها الوان بحيث كل لون بيشير لنوع النظام وهكذا والنظام بردوا بيتكون من المخارج اللى بتستخدم لاخراج الغازات الطبية وطبعا بيبقي فيه اجهزة قياس سواء جهاز ضغط او سريان وطبعا بيبقي فيه مجموعة المحابس اللى بتستخدم لعمل كنترول او تحكم على النظام وبعد كدا بيبقي فى بقي جزء وحدة خدمة المريض بالاضافة لنظام الانذار والمراقبه الموجود فى المبنى والنظام دا ظهر لتلافى المشاكل الناتجة عن استخدام اسطوانات الغازات الطبيه المحموله PORTABLE من مكان لمكان والاسطوانات دى بتكون مضغوطة لضغوط عاليه جدا وبالتالى نقلها وخطرها بيبقي كبير جدا وبردوا ظهرت انظمة الغازات الطبيه كمان عشان نعمل نظام مراقبه لحالة وجود الغازات وضمان وصولها للمريض بحيث يتم عمل نظام انذار فور حدوث اى مشكلة فى الامدار بالغازات وبالتالى نبقي حافظنا على المريض بالاضافة كمان ان انا فى النظام دا باقدر اعمل نظام احتياطي ومخزون استراتيجي للغازات بحيث يتم استخدامها عند الحاجه مش لو الاسطوانه خلصت ملاقيش غيرها مثلا لذلك ظهرت انظمة الغازات الطبيه لمعالجة كل المشاكل دى ودي باختصار انظمة الغازات الطبيه وضغط الهواء ودا اللى مسئول عنه قسم ميكانيكا سواء بقى مهندس الصحي او الميكانيكا بيبقي مسئول عنه مش هتفرق كلاهما ميكانيكا لان الكود المصرى ذكر التركيبات الخاصة بالغازات الطبيه مع التركيبات الصحية على اساس انهم ممكن يكونوا مع بعض كـplumbing ولكن انا بحب اقسم التقسيمة دى انها كاعمال ميكانيكا المهم انك دلوقت لازم تبقي عارف ان الانظمة دى مهندس الميكانيكا المسئول عنها والمفروض انك دلوقت تبقى اخدت ولو نبذه مختصره عن الانظمة دى .
نيجي بقى لقسم الكهرباء ودا بيندرج تحته انظمة مختلفة وهنختصر فيه بردوا عشان الفكره كلها فى المحاضرات دى انك تبقى عارف كل نظام بيتكلم عن ايه ومين القسم المسئول عنه - المهم نيجي بقي للكهرباء وهى كالاتى :
اولا انظمة الاضاءة اللى عباره عن وحدات الاناره اللى بتنور المبنى ووحدات الانارة دى لها انواع كتير وبتختلف من نوع لاخر على حسب معايير وfactors معينه بالاضافه طبعا لو فيه PHOTO CELL اللى بتشحن بالطاقة الشمسية وتنور عند غروب الشمس بالاضافة طبعا لمفاتيح الاضاءه بالاضافة لنظام الKNX اللى بيوفر فى الطاقة بحيث انه ينور الأماكن المطلوبه في الوقت المطلوب فقط وطبعا النظام دا مش بيطبق فقط في الاضاءه ممكن يطبق على الأنظمة اللى يمكن التحكم فيها بحيث الأنظمة االلى مش محتاجينها في وقت معين لا يتم تفعيلها وهكذا وطبعا دا بيوفر كتير في الطاقة وولذلك دا من متطلبات شهادة الLEED للي يعرفها وبردوا ان شاء الله هنتكلم عنها فى محاضرات قادمة باذن الله فمثال على نظام KNX لو ماشيين مثلا خلال طرقه فى مبني فالمكان اللى الشخص هيمشي فيه فى الطرقة هو اللى بينور واول ما يمشي الشخص بعيد عن المكان دا الاضاءه هتطفي وتنور في المكان اللىلاماشي فيه ودا طبعا بيوفر كتير فى الطاقة نفس الفكره بالضبط بالنسبة للانظمة فالانظمة اللى مش محتاجينها فى المبنى فى وقت معين بيتم ايقافها اوتوماتيك وهكذا ولكن انا هنا ذكرت النظام دا في الاضاءه عشان دا المشهور في معظم المشاريع الحالية كتطبيق للنظام دا وفي حاجات تانية ضمن نظام الاناره بردوا هي أعمدة الانارة وهكذا.
تانى حاجه بقي فى قسم الكهرباء انظمة الباور ودي أنظمة متشعبه زي ما قلنا قبل كدا فى المحاضرة اللى فاتت فهى مش فقط نظام الباور داخل المبنى يعنى مخارج الباور اللى هيا POWER SOCKETS و مفاتيح الفصل DISCONNECT SWITCHES بالاضافة للكابلات والتريهات CABLES TRAYS والترنكات CABLES TRUNKS وغيره يعنى POWER DISTRIBUTION داخل المكان فطبعا دا بس نظام الباور داخل المبنى انما احنا لازم نبقى عارفين ان نظام الباور بيبدا من اول أنظمة الجهد العالى HIGH VOLTAGE اللى بتبدأ من اعلى من 66 كيلوفولت فيما اكثر ودي الانظمة اللى بننقل بيها الكهرباء على مسافات كبيره وفيه انظمة الجهد المتوسط MEDIUM VOLTAGE اللى بتبدأ من 66 كيلو فولت لاحد 11 كيلو فولت ودي الانظمة اللى بنوزع بيها الشبكات والجهد المنخفض LOW VOLTAGE اللى بيبقي غالبا من 1000 فولت فيما اقل ودى الانظمة اللى بتستخدم فى تغذية الاحمال القليلة زي احمال المبانى او الانارة للطرق والشوارع وهكذا وبالتالى لازم تبقى عارف ان انظمة الباور أنظمة نقل وتوزيع القدرة من محطات التوليد لاحد ما نوصل لاحمال المبنى بما فى ذلك من موزعات ومحولات SWITCHGEARS و TRANSFORMER.
تالت حاجه نظام الارضي اللى هو EARTHING اللى هو التأريض زي ما قلنا قبل كدا انه بيتم توصيل المعدات الكهربية بالارضي لحماية الافراد والمعدات لان طبعا الارض مقاومتها قليلة جدا ومقاومة الانسان كبيره فلو حصل تعرض للانسان بانه يكون جنب اى معدة حصل فيها مشكلة واصبحت موصله للكهرباء ففى حالة ان المعده متوصلة بالارضي فالتيار الكهربي بيبقي ليه مسارين يختار هيمشي فى اى مسار بينهم وهما الانسان والارض ولان الانسان مقاومته عالية والارض مقاومتها قليلة جدا ففى الحالة دى التيار بيختار يمشي فى الارض عشان مقاومتها قليلة طيب لو مفيش ارضي للمعده ففى الحالة دى التيار الكهربي مش هيبقي قدامة غير مسار واحد وهو الانسان اللى جنب المعده وبالتالى هيكهرب اى انسان موجود ودى ببساطة فكرة نظام الارضي.
رابع حاجه نظام LIGHTENING ARRESTORS للحماية من الصواعق واخطار الشرارات الكهربيه اللى ممكن تحصل خلال حدوث الصواعق ودا فكرته ببساطة ان لما بيحصل صواعق بتولد تيارا كهربي شديد شرارات كهربيه ممكن تأثر على الافراد ولمعدات والاجهزة الكهربيه وبالتالى بيتم تركيب مانع الصواعق باعلى نقطة فى المبنى وبيكون طولة كبير بقدر الامكان ودا كله عشان يبقي اول حاجه تقابل التيار الكهربي وبيتم تجميعه عن طريقه وبيتم ساعتها توصيل مانع الصواعق دا بالارضي اللى لسه شارحينه وبالتالى بيتم تفريغ الشرارة الكهربيه دي فى الارضى.
خامس حاجه انظمة الاسكادا SCADA اللى هي زي ما قلنا بتتحكم فى الانظمة الموجوده فى المبنى فبتاخد إشارات معينه من الحساسات الموجوده فى نظام التحكم زبيتم ارسال الاشارات دى للحاسب او الكمبيوتر الرئيسي بحيث نقدر نتحكم ونراقب محابس معينه متصله بيها وبناءا على الإشارات دي بيتم المراقبه على النظام من خلال شاشة كمبيوتر ونشوف ACTION المطلوب وبيظهر استخدام النظام دا فى العمليات الصناعية وتوليد الكهرباء وتكرير البترول واعمال المعالجة المياه وخطوط البترول وخطوط توزيع الكهرباء وفى بعض التطبيقات الزراعية وانظمة الرى الحدثة.
ونظام الاسكادا بتتكون من حاجتين اساسين :
HARDWARE
SOFTWARE
بحيث الجزء HARDWARE يستقبل الاشارات ويجمع البيانات من الحساسات ويوصلها مركز التحكم اللى بيحتوي على كمبيوترات وكدا عن طريق نظام الاتصال COMMUNICATION والكمبيوترات دى بيبقي عليها المكون التانى اللى هو ال SOFTWARE الخاص بالاسكادا والسوفت دا بيقوم بمعالجة الداتا اللى بتوصله وبيحولها لاشكال ورسومات يمكن للمشغلين مراقبتها وفهمها والتحكم فيها بحيث يقدر يدخل معدة معينه فى الشغل ويوقف معده تانية
اذن الخلاصة في النظام دا باختصار شديد هو انه بيبقى على الشكل التالى وهو انه حساسات بتدي إشارات الى حاجه اسمها RTU OR PLC بحيث انها بتستقبل الإشارات دى وتحولها الى لغه الاسكادا تقدر تفهمها وبالتالي RTU OR PLC بتقدر تنقل الإشارات دى الى مركز التحكم ومن خلال السوفت والبرمجه الخاصة بالاسكادا بيتم تحويل الإشارات دى الى رسومات واشكال ميمكن فهمها بواسطة المشغلين OPERATORS .
سادس حاجه نظام الUPS ودا زي ماقلنا قبل كدا بيستخدم فى حالة ان فيه أنظمة انا مش عاوزها تفصل ابدا حتى لو الكهربا قطعت زى الDATA CENTER وفكرة الUPS باختصار انه عباره عن بطارية بتشحن عن طريق تحويل التيار من متردد لتيار مستمر عن طريق RECTIFIER وتفرغ ساعة الحاجه بحيث انه يبقى فيه INVERTER عشان يحول التيار المستمر الى تيار متردد عشان اغذى بيه الحمل وشكل الUPS بيبقي كدا ومش كله احجامه زى اللى في الصوره ولكن احجامه بتختلف على حسب السعه والقدرة المطلوبه ودا على حسب انت عاوز لتطبيق ايه
سابع حاجه انظمة التغذية بالكهرباء من خلال الخلايا الشمسية ودا بيتم استخدامه فى بعض المشاريع الموجوده فى اماكن معرضة لطاقة شمسية شديده بحيث يتم استغلالها في توفير الطاقة الكهربية الأساسية لبعض التطبيقات ودا بردوا من بعض الأساسيات اللى بتدي نقاط في شهادة LEED للى يعرفها وان شاء الله هنشرحها في الكورس بتاعنا ولكن المهم ان النظام دا مكوناته الأساسية بتكون عباره عن الواح الشمسية والالواح دى بتمتص اشعة الشمس وبالتالي بيتم توليد الكهرباء وتخزينها في بطاريات وبعدين بنركب انفرتر للتحويل من تيار مستمر الى تيار متردد وبالتالي بيبقي عندنا تيار مستمر متوفر وتيار متردد ونغذي بقي على حسب الاحمال عاوزه تيار ايه.
ثامن حاجه نظام المولدات ودا زي ماقلنا من شويه انه مشترك بين الميكانيكا والكهرباء وشرحنا القسمين واحنا بنوضح قسم الميكانيكا.
ولاحد هنا هنوقف عشان المعلومات ماتبقاش كتير وتقدر تستوعب بسهوله وان شاء الله نكمل الأنظمة دى في المحاضرة اللى جاية باذن الله ان كان في العمر بقية.
وفى النهاية الحمد لله على ماقد كان وما هو كائن وما سيكون
دمتم فى رعاية الله وأمنه
والسلام عليكم ورحمة الله وبركاته
ليست هناك تعليقات:
إرسال تعليق